SHILLONG: West Jaintia Hills a·jao donggipa dingtang dingtang self help group (SHG)-rangna uamangni jakni kamrangko mesokna aro janggi tangani gadangko tang·doatna cholko on·na gita mijal Sukrobar salni bako dingtangmancha SHG Mela-ko Thadlaskein-o ong·atangaha aro ia Mela-ko ong·atanio a·dokni Chief Minister Conrad Sangma baksana Jowai-ni MLA Wailadmiki Shylla aro gipin dilgiparangba dongpae bakko ra·angaha.
Ia SHG Mela-ko ong·atanio a·dokni Chief Minister, jinmana aganprakangengon, a·dokni dingtang dingtang biaprango donggipa SHG-rangko tang·doatna aro nambata janggi tanganiko on·na gita sorkari, batanggimin bilsi gittam atani gisepon gong kror 124 tangkarangko SHG-rangna on·aha ine parakangaha.
Ia tangkarangko sorkari, National Rural Livelihood Mission (NRLM)-ni ning·o SHG-rangna on·aha aro 2018 bilsina skangde bilsi 10-ni gisepo gong 35-kosan on·engkuachim ineba Chief Minister parakataha. Skango kror 12 ong·gipa loan-rangko da·o kror 66 gapate on·na man·aha ineba Sangma a·kangataha.
“Chinga dingtange kamrangko ka·gen ine aganon, chinga sorkarini kamrangko nambatate manderangona sokatanikosa miksonga aro chinga apsan scheme-rangkon nambate manderangona sokate on·na man·engaha,” ine Sangma aganaha.
SHG-rangko sorkarini mikkango ong·atna miksonganio ia sorkari, a·dokni SHG-rangko bilakbatatna a·bachengataha ineba Chief Minister parakataha.
Ia SHG mela-ko ong·atanio a·dokni Chief Minister, Jowai-ni MLA Wailadmiku Shylla baksa, Meghalaya Rural Bank (MRB)-ni on·enggipa gong lak 82-ni loan-rangko, dol 82 SHG-rangna on·angaha aro unbaksana gong lak 56.5 ong·gipa Community Investment Fund-ko dol 11 Village Organisation (VO)-rangna aro gong lak 15-ni Vulnerability Reduction Fund-koba dol 15 VO-rangna on·angaha.
Meghalaya sorkarini ra·gatgipa Farmers Collectivisation for Upscaling Marketing Systems (FOCUS) program-ni ning·o gong lak 29.90-ni cheque-rangkoba ia tom·anio Chief Minister-ni jakchi, West Jaintia Hills a·jani dol 46 Producers Group-rangna on·angaha.
