SHILLONG: Batanggimin GHADC election-o Garo Hills a·jao party-ni tang·doaniko nikna man·ahani gimin mikkangchi 2023 Assembly election-o nambate kam ka·e chena ka·dongsoaniko UDP-ni dilgipa aro KHADC-ni CEM Titosstarwell Chyne aganaha.
“Batanggimin MDC election-oni ching party Garo Hills sector-o nambataha aro mijaomangmang matchotanggipa Rajabala bye-election-oba Garo Hills-ni manderangni regional party-na chakpaaniko niktaina man·aha. Indake ong·engon 2023 bilsini Assembly election-o chinga Garo Hills-o biapko man·a ka·dongsoenga, ine Chyne aganaha.
“Khasi aro Garo dilgiparangni gisepo name dake agangrikanirang komia aro batanggimin adita bilsirangonin party, Garo Hills sector-ona name gisik on·ataba dongja. Indiba ia gital leadership, gital team aro apsan ong·e daitoko ra·e kam ka·enba Garo Hills-o party-ko bilakatdapna gisik on·batna chanchiaha, ineba Chyne aganaha.
Indake ong·engon Rajabala by-poll-o UDP-ni candidate-na congress-ni manderang campaign ka·ani bidingo Chyne indine aganaha, “Congress ong·ama ong·ja iani gimin agana man·ja indiba chingni candidate Shira, congress party-oni MDC man·bagipa ong·a, iako chinga jechakna man·jawa. Jensalo saksa party-ni dilgipa ong·katon ua an·tang baksa mitam dilgiparangko rimchapronga, apsan daken Shira-ba congress-oni ong·katon an·tangni supporter aro dilgiparang baksa re·baaha.”
“Minggipin Congress party dilgiparangni gisepo meligrikgijaniko nikna man·enga, unbaksana a·dokni manderangba uamangni meligrikgijaniko nike aratpiljok, uni gimin beben gital party aro gital sorkariko nikna ka·donggen, ineba Chyne, by-poll-o congress-ni siani gimin aganataha.
