TURA: Adita salrangna skang, A·chik Holistic Awakening Movement (AHAM) dolni ine a·kanggipa adita sak manderang, Tura Bishop House-o niam gri napdraenba, Mendipathar Parish-ni Pamong Father CA Thomas-ko salsnini gisepon Mendipathar-oniko ra·galchina gita Tura Diocese-ni Bishop Rt Rev Andrew R Marak-ko ka·mikkenataha ine Tura Diocese-ni ning·o donggipa Garo Hills Catholic Union (GHCU) matnangataha.
Iani bidingo GHCU-ni Executive Committee, re·anggipa Sonibar salo Tura-o tom·e chanchirimangenba, Garo Hills-o Catholic Mondoliko dilenggipa mandeni kosako kragija dake ka·mikkenatahaniko on·ahani gimin AHAM dolni kosako raken jegalanirangko dakangaha.
GHCU-ni secretary Raphael G Momin-ni parakatani gitade, re·anggipa October jani 19 tariko, an·tangtangko AHAM dolni ine a·kanggipa adita sak membor-rang, maming niam gri Tura Bishop House ning·chi napangaha aro uano Tura Diocese-ni Bishop Rt Rev Andrew R Marak-ko grongenba, Mendipathar Parish-ni Pamong Fr CA Thomas-ko sal 7-ni gisepon Mendipathar-oniko a·rikgalchina ka·mikkenataha.
“Iandakgipa obosta ong·aniko chinga Catholic Union-ni gita raken jegalenga aro mikkangchi Catholic Mondolini kamrango je NGO ba uandakgipa dolrangni niam gri jak on·paaniko chinga nie dongjawa. Mikkangchi iandakgipa a·selrang ong·taigenchimode chinga aino pangchake rakgipa ja·kurangko de·na nangao ga·akgen,” ine GHCU-ni secretary parakataha.
Momin-ni u·iatani gitade, iandakgipa ka·mikkenataniko man·ani ja·man Tura Diocese-ni Bishop, Mendipathar Parish-ni Pamong Fr Thomas-ko adita salrangna chutti ra·e a·doktangona re·angchina gita u·iataha.
Tura Diocese-ni ning·o donggipa GHCU dolara, register ka·gimin dol ong·e a·dok aro ma·mong sorkarini recognise ka·gimin dol ong·a aro ian New Delhi-o donggipa All India Catholic Union (AICU)-o bak ong·enggipa dolba ong·achim.