TURA: 2012 bilsionin dabibaenggipa Garo Traditional Medicines Protection & Promotion Bill-ko pass ka·e on·china gita Tura-ni Meghalaya Samachik Association (MSA), Garo Hills Autonomous District Council (GHADC)-ni Chief Executive Membor (CEM)-na changsataie sedoataha.
GHADC-ni CEM-na sedoatgipa chittio MSA-ni general secretary Dr Vidyanisth Marak-ni parakatani gitade, iani bidingo 2012 bilsion association-ni membor-rang GHADC-na sedoataha aro uandaken GHADC-ni Executive Committee-ba 2019 bilsio draft bill-ko tarie Meghalaya sorkarini ning·o donggipa District Council Affairs department-ni Commissioner & Secretary-ona watdoatahachim. 2019 bilsio ia draft bill-ko Meghalaya sorkariona watatani ja·man da·onan iani bidingo GHADC-ni gita aro Meghalaya sorkarini gitaba maming ja·ku de·anirang dongkujaenga ine MSA-ni general secretary parakataha.
“Uni gimin ia Garo Traditional Medicines Protection & Promotion Bill-ko GHADC-o pass ka·e A·chik samrangko ripinge rakkina aro namdapatna man·na gita GHADC-ni ning·o Garo Traditional Medicine Commission-ko songchina aro GHADC-ni ning·o Traditional Ethnic Hospital ge·sako kulichina chinga mol·molenga,” ine Dr Vidyanisth Marak parakataha.
MSA-ni parakatani gitade, Khasi Hills-ode Khasi jatni samrangko ripingna aro namdapatna gita 2011 bilsion Khasi Hills Autonomous District Council (KHADC) pass ka·e on·manahachim indiba Garo Hills-ode 2012 bilsionin ia Bill-ko pass ka·china dabiengoba da·onan maming ja·kurangko de·kujaengachim.
