TURA: South Garo Hills a·jao Nengkong Se·el Adugre skul nokko rikna gita sorkarini tangka paisarangko chame on·aoni da·o bilsi bonga-dokmang batangpilengahaoba da·onan ia skul nokko matchotchipkujaenga ine Garo Students Union (GSU) Karukol regional unit parakatenba, ia skul nokko rikenggipa contractor-ni kosako rakgipa ja·kurangko de·china a·dok sorkariko didiataha.
GSU Karukol regional unit-ni u·iatani gitade, Nengkong Se·el Adugre LP skul nok obosta namsrangjaengaha ine nikenba sorkari, ia skul nokko rikna gita 2015-16 bilsirangon sanction ka·e on·ahachim indiba da·o 2021 bilsi bon·angpilahaonan ia skul nokko rikenggipa contractor, kamrangko matchotatchipgija donengachim.
“Ia songrango donggipa ma·a paarang, detangtangko gipin biaprangona watate aro namkala skulrango poraiatna chol ong·jae ia skulon poraiatpaengachim indiba ia skul nokko rikenggipa contractor, skul nokko matchotatchipgija donengani a·selan skulo poraienggipa bi·sarang neng·nikanirangko man·tokenga,” ine GSU Karukol regional unit-ni president Matsram N Marak, an·tangni suk ong·gijaniko parakatenba, ia contractor-ni kamko name sandichina Education department-ni official-rangko didiataha.
Ia skul nokko maini a·sel matchotatningna man·jaengachim, uani bidingo songni manderangna aro jolni NGO-rangna talate on·china gitaba GSU Karukol unit, ia skul nokko rikenggipa contractor-ko didiataha aro iani bidingo ta·raken aganchakaniko on·na man·jagenchimode jolni NGO-rang, ia contractor-ni kosako rakgipa ja·kurangko de·anggen ine mikrakataniko on·angaha.
