TURA: Meghalaya a·dokni SSA skulrango skigiparang re·anggipa June jaonin da·o gimik jabongani dormaharangko man·kujae neng·nikanirangko chagrongna nangtokengahani gimin re·baenggipa December jani skanggipa antio skigiparang, New Delhi-o donggipa Jantar Mantar-ona re·ange jingjengatskana tik ka·aha ine All Garo Hills SSA School Teachers Association (AGHSSASTA) parakataha.
AGHSSASTA-ni parakatani gitade, SSA skulrango skigiparangni dormaharangko somoi gita on·china batanggimin somoirangoba skigiparang, changni chang a·dokni Chief Minister aro Education Minister-na sedoatmanahachim aro re·anggipa October-ni 26 tarikoba skigiparangni Williamnagar-o jinma re·jomaniko ong·ate jingjengatani somoioba Union Education Minister Dharmendra Pradhan-naba uamang, memorandum-ko on·atahachim.
“Chinga chingni dormaharangna indita chang dilgiparangna sedoatani ja·manoba da·o jabonga ong·pile chingko okumu donengani gimin chinga New Delhi-ona re·ange, Jantar Mantar-o jinma asonge jingjengatskana tik ka·aha,” ine AGHSSASTA-ni president LG Momin parakataha.
