SGH-ni dingtang dingtang biaprango DLSA-ni awareness program-rangko ong·ata

BAGHMARA: ‘Azadi Ka Amrit Mahotsav’-ni bak gita jagimikna South Garo Hills a·jani dingtang dingtang biaprango District Legal Services Authority (DLSA)-ni gita Pan India Awareness & Outreach program-ko ong·atengon, batanggimin salrangoba ia apsan program-kon dingtang dingtang songrango ong·atangkuaha.
South Garo Hills a·jani Nikwatgre songo ia Pan India Awareness & Outreach program-ko ong·atanio South Garo Hills-ni Chief Judicial Magistrate Daniel S Marbaniang, jinmana aganprakengon, Legal Aid Service ba ainni gita manderangna dakchakanirangko on·ani bidingo talate on·angenba, je manderangan kacharirango case-rangko jako ra·na gita ukilrangko rimna chol ong·jachim, ian uandakgipa cholgri manderangna indin dakchakanirangko on·ani ong·enga ine parakangaha. Maidakgipa case-rangna ia legal service-rangko on·na man·achim, uarangni giminba Marbaniang agan-talate on·angjolaha.
Ia program-ko ong·atanio jolo Para Legal Volunteer ong·e kamko ka·enggipa Milan M Sangma-ba jinmana aganprakangengon, para legal volunteer-rangni kamrangni gimin talate on·angenba, an·tangtangko para legal volunteer dake bimingko segatenba maikai songni nokni manderangna dakchakanirangko on·na man·gen, uarangni gimin talate on·angjolaha.
Baghmara Bong Market-o ia apsan dakgipa program-ko ong·atanio South Garo Hills a·jani First Class Judicial Magistrate RDK Sangma, jinmana aganprakangskaengon, sorkarini on·enggipa dingtang dingtang scheme-rang, jekai victim compensation scheme, old age scheme, workers in unorganised scheme aro uandakgipa scheme-rangni gimin talate on·angenba, an·tangtangni namgnina ia scheme-rangko ra·china manderangko didiangaha.
Ia tom·anio Baghmara-ni CI Subir Sangma-ba jinmana aganprakangengon, traffic-ni niamrang aro motor vehicle ba gari gorarangni niamrangni gimin talate on·angenba, an·tangtangni naljokgnina chakka samgni donggipa motorcycle-rangko salengon, helmet-rangko ganjringchina aro gari gorarangko salengon churing chupeke garirangko saljachina gita mikrakataniko on·angaha.
Ia apsan dakgipa program-rangko batanggimin salrango, South Garo Hills a·jani Rangdokram, Government Higher Secondary School aro uandakgipa dingtang dingtang biaprangoba ong·atangaha.