TURA: Batanggimin jarangonin South West Garo Hills a·ja gita ro·ong salruragipa truck garirangni manderangko salpake siatanirangko nikna man·engon, Mongolbar saloba Zikzak bazar samba jolo donggipa Agongittim minggipa songo bike bolsa, dumper truck gari baksa chagake a·sel ong·taiaha.
Kobor on·timgiparangni u·iatani gitade, ia a·sel ong·anio bike-o re·angenggipa adasa sakgnian bilongbee saknaanirangko man·aha aro ia koborko seatengmiting somoiona kingkingan uamangni janggirangna mai ong·gen name ma·sikujaengachim.
Ia adasa sakgniara Zikzak Dombagre songoni ong·achim aro uamang Mongolbar attamchibara 3:00 bajimango Agongittim minggipa songo, ia dumper truck gari baksa chagake a·sel ong·aha ineba kobor on·timgiparang u·iataha.
A·sel ong·anio adagipa ja·a be·na nangaha aro uni nogipaba bilongbee saknaanirangko man·ahani gimin a·sel ong·ani ja·mano uamangko Zikzak hospital-ona ra·angchengaha ine kobor on·aha.
Ia dumper truck garini mikkango sea dongani kride ian PWD-na jakkalenggipa gari ong·achim.
Batanggimin jarangonin Bangladesh a·songona ro·ong salruragipa truck garirangni skatang salengani a·sel bang·a janggirang gimana nangengahani gimin ia rama gita ro·ong salaniko champengchina gita dingtang dingtang dolrang dabitokengachim ine nikna man·a.
Ia rama gita ro·ong salruragipa truck garirangni re·ruraaniko dontongatchina dabie adita salrangna skangsan Ampati-oba dingtang dingtang dolrang, jolo songdongenggipa manderang baksa jinma tom·bimonge re·jomaniko ong·atangahachim.
