TURA: North Garo Hills a·jao donggipa Mendipathar College-ni bilsi 50 gapaniko November 10 tarik dipet manina a·bachengataha aro ia manianiko a·bachengatani salo North Garo Hills a·jani Deputy Commissioner RP Marak, mongsonggipa sokgipa ong·e ia manianiko do·ga oe on·angaha.
Mendipathar College-ko 1971 bilsio kuliahachim aro ian private college-sa ong·genchimoba University Grants Commission (UGC)-ni recognised ka·gimin college ong·e da·o North Eastern Hill University (NEHU)-ni ning·o donatako man·gimin college ong·engachim. Ia college-o da·o dipet IT aro Arts stream-ni dingtang dingtang course-rangko on·enga aro ia course-rangoni mongsongbatgiparanga, BA aro Certificate ong·enga.
Mendipathar College-ni bilsi 50 manianiko a·bachengate on·angani somoio North Garo Hills a·jani Deputy Commissioner RP Marak, jinmana aganprakangengon, ia college-ni bilsi 50 gapaniko nikna man·ahani gimin an·tangni kusi ong·chakaniko parakangenba, poraienggipa chatro chatrirangni namgnina ia college-ko kulina gita rakbee kam ka·dilgipa manderangko mittelpilangaha. Mikkangchi ia college-ko niksenggipa ong·atchina gita ua college-o poraienggipa chatro chatrirangkoba didiangaha.
Ia manianiko a·bachengatani somoio dongpae bakko ra·anggipa gipin manderangara, North Garo Hills DRDA-ni Project Director ZJ Sangma, Krima No. I-ni Executive Secretary Rev Alpha Sengba D Marak aro gipinrang ong·a.
Indake ong·engon, Mendipathar College-ni bilsi 50 gapaniko re·baenggipa November 17 tarikona kingking dingtang dingtang program-rangko ong·ate manianggen aro bon·kamgipa salo a·dokni Chief Minister Conrad Sangma-ba dongpae bak ra·anggen ine kobor on·aha.
