TURA: Garo Hills-o gul murisko ge·anio chu·sokgipa ong·ani ja·man bang·a game ge·e cha·giparangna janggi tangani cholrangko on·ahani gimin ia 2021 bilsini Padma Shri Award-ko Gondagre songni Nanandro B Marak-na on·ani ja·man Garoland State Movement Committee (GSMC)-ni gita una namgipa skanirangko on·ataha.
Ian gnigipa changna Nanandro-ni Padma Shri Award-ko man·ani ong·ahachim maina iana skang re·anggipa January-ni 26 tariko a·songni Republic Day-ko maniani somoioba una ia apsan upattikon sorkari on·ahachim.
Asongni mingnamgipa Padma Shri Award-ko man·gipa Nanandro Marak, 1986 bilsimango gul muris chara pangsako ra·e gue bol ja·pango ge·chengahachim aro bilsigittamni ja·manon ia charaoni bite nangna a·bachengahachim. Bite nangna a·bachengahaon ua gul murisni damko ma·sina gita bazar antirangona re·ange sing·sandina a·bachengaha aro ia biteni damko ma·siahaon rake kamko ka·na kang·kare kaaha. Bilsiantian ua pang 80 ba pang 100 dake gul muris chararangko ge·na a·bachengaha aro ia gul muris chararangko ua gue bolrango aro gipin bolrangoba ge·aha. Uni bagano chu·onga gitan bolrang dongani gimin ua gul murisko bang·en ge·na man·aha aro da·o ua bilsiprakon quintal 200-mangni gita gul murisko man·engaha.
Indake ong·engon, uni kamtango bimchipani a·sel da·o ua niksenggipa ong·ahani gimin aro a·songni mingnambatsranggipa upattiko man·ahani gimin GSMC-ni gitaba Marak-na nama skaniko parakataha aro uni kamrangko nike ia upattiko on·ahani gimin a·songni President Ram Nath Kovind baksana Agriculture department aro una dakchake on·gipa pilak manderangkoba mittelpilataha.
“Kamtangchi A·chik a·songna mikkim rasongko ra·baahani gimin chinga Nanandro Marak-ko dingtangmancha mittelpilna ska,” ine GSMC-ni dilgipa Ryan Ch Marak parakataha.
