SHILLONG: Meghalaya a·dokni SSA skulrango skigiparang jabongani dormaharangko man·tokkujaengoba mikkang antini gisepo ma·mong sorkari, gong kror 59 tangkarangkosan a·dokna on·atengani gimin skigiparang jagnini dormaharangkosan man·chengkuainaba gnang.
Meghalaya a·dokni SSA skulrango skigiparangna dormaharangko on·na man·na gita ma·mong sorkari, mikkang antion gong kror 59 tangkarangko on·atnaba gnang ine Budbar salo Meghalaya a·dokni Education Minister parakatahachim.
Indake ong·genchimoba, a·dok gimikni sak 12,541 SSA skigiparangna japrakni dormahako on·na gita sorkari gong kror 26-mangko nangengani gimin ian jagnini dormahanasan chu·ongainaba gnang ine niksamsona man·enga.
Meghalaya a·dokni Education Minister Lahkmen Rymbui-ni u·iatani gitade, ua Budbar salo Delhi-o donggipa Education department baksa skigiparangni dormaharangko on·na gong kror 140-mangko on·atchina mol·molahachim indiba ma·mong sorkari, da·o dipet gong kror 59 tangkarangkosan on·atchengna ku·rachakaiahachim.
“Chinga SSA skigiparangni neng·nikanirangko ma·sichakengani gimin chu·gimik dormaharangko on·na man·na gita komibeoba gong kror 140-ko on·atchina ma·mong sorkariko mol·molahachim indiba da·o dipet gong kror 59-kosan on·atna gita ma·mong sorkari ku·rachakaniko on·ataha. Ia tangkarang mikkang antiode a·dokona sokbagen ine chinga ka·dongenga aro tangkarang sokbaahaon chinga skigiparangna komibeoba jagnini dormaharangkode on·na man·gnok,” ine Rymbui parakataha.
SSA skigiparangna jabongani dormaharangko on·na man·kujaengani gimin a·dokni Chief Minister Conrad Sangma-ba an·tangni suk ong·gijaniko parakataha aro ian Meghalaya a·dokosan ong·aigija a·song gimikon ong·enga ine talataniko on·angaha.
Tangka paisarangko ra·sroenba SSA skigiparangni dormaharangko on·china gita a·dok sorkario dabienganina aganchakaniko on·angskaengon, SSA-ra ma·mong sorkarini scheme-sa ong·ani gimin indita tangka paisarangko a·doktangoniko jakkalna gitade a·dok sorkari neng·nikanirangko man·skagen ine Chief Minister parakataha.
SSA skigiparangna jabongani dormaharangko on·kujaengani gimin aro uamangni dingtang dingtang dabianirangko chu·sokatjaengani gimin Mongolbar salosan SSA skigiparang, Shillong songjinmao tom·bimonge sorkarini kosako jegalanirangko dakangtokahachim. Skigiparangni man·na nangkuenggipa jabongani dormaharangko changsanon on·gopchina gitaba skigiparang dabitokengachim.
