SHILLONG: Meghalaya a·dokni dam 12-gipa a·ja, chong·motan Eastern West Khasi Hills a·jako mijal Budbar salo a·dokni Chief Minister Conrad K Sangma, do·ga oe on·angaha aro ia gital a·jako do·ga oani somoio a·dokni dingtang dingtang dilgiparang aro ia gital a·jao songdongenggipa bang·bea manderang dongpae bakko ra·angtokaha.
Ia gital a·jako do·ga oe on·angani somoio a·dokni Chief Minister, jinmana aganprakangengon, ia a·jao Eastern West Khasi Hills ine mingani gimin manderangna talate on·angjolaha.
“An·chingni songsalara me·chikchiko ra·gipa songsalsa ong·ani gimin ia gital a·jako biming minganio gitcham district-ni bimingkoba man·chapatna nangnikaha. Ia jolrangara West Khasi Hills a·jani salaramchipak ga·akani gimin chinga Cabinet-ni gita chanchirimenba, ia gital a·jako Eastern West Khasi Hills mingna tik ka·aha,” ine Chief Minister parakataha.
Ia gital a·jako Eastern West Khasi Hills ine mingengani gimin dingtang dingtang dolrang jegaltokengachim ine nikna man·a.
Ia gital a·jako bikotanichi jolo songdongenggipa manderangna sorkarini kamrangko sepangbatatgnok ine Chief Minister parakataha.
Ia gital a·jako bikotaniara jolo songdongenggipa manderangni ru·utbea bilsirangna nangnikengani ong·achim ine janapatengon, dingtang dingtang niamrangko nichengesa sorkari ia gital district-ko bikote on·na man·aha ine Chief Minister parakataha.
Ia gital a·jako uni sorkari maming mikkang niteani grisa bikote on·aha ineba ua parakataha.
Chief Minister-ni aganani gitade, ua Khasi Hills-o maiba nama kamrangko chu·sokate on·ahaode Garo Hills-o iako ong·gija dake chanchisretronga aro ua Garo Hills-o maiba namroro silroroani kamrangko ra·gate on·genchimoba apsan daken Jaintia aro Khasi Hills-oba uni kamko manderang ma·sisretrongengachim.
“Uni gimin anga na·simangna iako talate on·na ska, chong·motan chingni MDA sorkaride jat, torom ba biapko basegipa sorkari ong·ja aro chingna Khasi, Garo aro Jaintia Hills-ni gisepo maming dingtanggrikatani dongja. Banoba namdapataniko nangenga ong·ode ua biapo chinga pangnan namdapataniko ra·banana jotton ka·ronga,” ine Sangma parakataha.
Ia Eastern West Khasi Hills a·jao nokdonggae on·ani somoio Assembly-ni Speaker Metbah Lyngdoh-ba dongpae jinmana aganprakangengon, ia gital a·jako bikote on·china gita manderangni dabianiko knachakahani gimin a·dokni Chief Minister Conrad Sangma aro a·dok sorkariko mittelpilangenba, ian jolo songdongenggipa manderangna gisik ra·kamani sal ong·gnok ine parakangaha.
Mairang civil sub-division-ko 1976 bilsini November 10 tariko songahachim aro uandaken da·o bilsi 45-ni ja·man ia apsan tarikon ia sub-division-ko district-ona ra·doatskaaha. Ia gital district-ni ning·o Mairang aro Mawthadraishan C&RD Block-rang donggen aro ia gital district-ni headquarter Mairang ong·gen.
