TURA: Pan India Awareness & Outreach Campaign-ni bak gita West Garo Hills a·jani Gambegre C&RD Block-ni ning·o donggipa Somonpara-oba free health camp-ko ong·atangaha aro ia health camp-ko ong·atanio dingtang dingtang songrangoni gimik sak 842-mangni gita namgnirangko man·riktokaha.
Ia free health camp-ko West Garo Hills a·jani District Legal Services Authority (DLSA) aro District Medical & Health Office (DMHO)-ni gita nangrime ong·atangaha aro ia health camp-ko ong·atanio Gambegre block-ni ning·o donggipa dam 15 songrangni manderang bakko ra·e namgnirangko man·rikaha.
Ia health camp-ko ong·atanio manderangna indin porikka ra·e niani aro sanna bananirangko on·angan baksana Megha Health Insurance, Aadhar, ICDS, Legal Service, COVID tika aro uandakgipa program-rangkoba ong·atangjolaha.
Ia free health camp-ko West Garo Hills a·jani District & Session Judge aro DLSA-ni Chairperson DR Kharbteng, a·bachengate on·angaha.
