TURA: Chibragre-ni Wangala A·damo ong·atenggipa 100 Drums Wangala festival ba dama bol 100-ko doke Wangala maniani gnigipa salo, Rugala baksana dingtang dingtang dolrangni
apsan chrokani, jatni kal·susaanirang aro budu salgrikanirangko nikna man·angtaiaha.
Ia 100 Drums Wangala maniani gnigipa salo North Tura-ni MLA Thomas A Sangma aro Selsella-ni MLA Ferlin CA Sangma, mongsonggipa sokgiparang ong·e bakko ra·angaha aro A·chikrangni daka rikaniko ripinge rakkina gita ia 100 Drums Wangala manianiko bon·atgija bilsiantian ong·atkuengani gimin Hundred Drums Wangala Festival Committee (HDWFC)-ko
mittelpilangaha.
Ia tom·anio Selsella-ni MLA Ferlin CA Sangma, jinmana aganprakengon, ia gital chasongni manderang toromko ra·engon, ma·sisretanirangchi jatni daka rikanirangkode gualangskaa gita ong·engaha ine aganangenba, torom baksa janggi tangengon, jatni daka rikanikoba gualgija ripinge rakkichina gita tom·anio bak ra·gipa manderangko didiangaha.
“Bang·bata A·chik songrangon Kristian ong·e napbolahaode an·ching jatni daka rikanirangko ma·sisrete jatni gamchatgipa dakbewal-rikbewalrangko galna a·bachengronga indiba toromko 
ra·engon an·ching jatni dakbewal rikbewalko gimaatna nanga ong·ja maina jatni dakbewal rikbewalrangko an·ching gimaatahaode mikkangchi janggi tangnagipa A·chik dedrangde A·chik jatni gunkon ma·sipajawaha,” ine Sangma, jatni dakbewal rikbewalko ripinge rakkiangkuchina gita didiangaha.
Apsan daken, North Tura-ni MLA Thomas A Sangma-ba A·chik chadamberangko, jatni daka rikani aro ma·manti gam-jinrangko ripinge aro tange rakkiangkuchina gita didiangaha.
Ia 100 Drums Wangala maniani gnigipa salo dingtangmancha songni nokni kamalrang, Rugala manianikoba dakdilangaha aro uni ja·mano ia Wangala manianio bakko ra·enggipa pilak dolrangan apsan dam bol 100-ko doke Wangalangaha.
