SHILLONG: Sukrobar salo, Meghalaya a·dokni Chief Minister Conrad Sangma, Ri Bhoi a·jani Jorabat Combined Water Supply Scheme-ko Umling C&RD Block-ni ning·o donggipa Mawsmai songo a·bachengate on·angaha.
Ia Water Supply Scheme-ko a·bachengate on·angani somoio a·dokni Chief Minister jinmana aganprakangengon, ia jolo donggipa song dambriko man·chape, skulrangna aro dingtang dingtang nokdangrangna ringani chirangko chu·onge on·na man·na gita ia water supply scheme-ko sorkari, Jal Jeevan Mission-ni ning·o a·bachengataha ine parakangaha.
Ia water supply scheme-na gong kror 13-na baten tangka paisarangko koros ka·aha ineba Chief Minister parakataha.
Ia Water Supply Scheme-ara Ri Bhoi a·jani Jorabat, Mawsmai, Ampher aro Amphranggiri songrangko man·chape Mawsmai GS Road, Nongthymmai, Nurimon, CTI Colony aro GS Road-o songdongenggiparangna ringani chiko sale on·na gita ra·gatgipa scheme ong·achim.
Ia scheme-ni ning·o damdok skulrangnaba chiko on·na gita cholrangko on·aha aro ia skulrangara, Mawsmai RCLP School, Mawsmai-ni Suryodaya LP/UP School, Nongthymmai-ni Charity Educare UP School, Ampher-ni St Jude’s UP School, Umpher RCLP School aro CTI Colony-o donggipa CTI LP/UP School ong·achim.
Ia Jorabat Combined Water Supply Scheme-ko a·bachengate on·anganio dongpae bakko ra·anggipa gipin manderangara, a·dokni PHE Minister Renikton Lyngdoh Tongkhar, Jirang constituency-ni MLA Sosthenes Sohtun aro gipinrang ong·a.