KSU, Lokayukta aro Women Commission-na chairperson-ko ta·rake songna mol·mola

SHILLONG: Khasi Student’s Union (KSU) dol, a·dok sorkariko Lokayukta aro Women Commission-na ta·raken chairperson-ko songchina mol·molataha.
“Commission-ni dal·dalgipa biaprang (post) bangbang ong·e dongenga, iarangko ta·raken gapatna nangenga, uni gimin sorkariko ta·raken ja·ku de·china chinga mol·molatenga,” ine KSU president Lambokstar Marngnar aganaha.
Re·anggipa bilsini October jaon MSCW-ni term matchotaha.
Kobor man·ani gitade, Search and Select Committee (SSC), chairperson aro memberrangni post-na sak 10 manderangni bimingko watatahachim indiba gital body-ko rikna man·kujaenga.
Sorkarini kam ka·anio ja·manchakengani gimin Marngar indine aganaha, “maini gimin sorkari ia kamo ru·utenga iani gimin darangba u·ija, indiba sorkari ia mamlako ta·rake niatgenchimode nambegen.”
Una skang Women Empowerment-ni Assembly Committee, apsan sing·anikon sing·ataha.
MSCW-ni office-onaba chittiko seataha, unbaksana kamo ru·utani gimin Social Welfare Department-ni Principal Secretary-ko okamataha.
Thma U Rangli-Juki-ba comission-ko songanio ru·utengani gimin sing·ataha.
Indake ong·engon Meghalaya Lokayukta gitcham PK Musahary-ni tenure bon·aonin a·dok sorkari darangkoba seoka dongkujaenga.
Musahary-ni term May jani 31 tariko bon·aha aro ua somoinin a·dokni Lokayukta, chairperson gri kam ka·enga. Koborni gitade a·dok sorkari gital chairperson-ko seokna kam ka·enga indiba kam ka·sinenga. Chairperson dongjani a·sel Lokayukta, gital gital case-rangko ra·chaknade man·a indiba maming case-kon register ka·na man·jaenga.