TURA: East Garo Hills a·jaoba ‘Azadi Ka Amrit Mahotsav’-ni bak gita adita salrangna skang, District Medical & Health Office, District Health Society aro District Legal Service Authority (DLSA)-ni gita nangrimenba, free medical camp-ko Rongjeng C&RD Block-ni ning·o donggipa Rongmil Don Bosco School-o ong·atangaha.
Ia medical camp-ko ong·atanio wilwilao donggipa dingtang dingtang songrangoni sak 300-mangni gita songni manderang dongpae bak ra·angtokaha aro uamangna dingtang dingtang doctor-rang, indin porikka ra·e nianirang baksa sanna bananirangko on·angaha.
Ia medical camp-ko ong·atanio East Garo Hills a·jani DMHO Dr Ivory Sangma, rimchaksoani kattarangko aganangengon, mikkangchiba songni nokni manderangna an·seng baljokanirangko on·na man·na gita iandakgipa program-rangko ong·atangkugen ine parakangaha.
Ia program-ko ong·atanio Dr CN Sangma, Tuberculosis (TB) sabisini gimin agan-talataniko on·angengon, seng·gnang porikkarangko ra·e sanna bananirangko ra·genchimode ian nampilna man·aigipa sabisisa ong·aia ine parakangaha.
Ia tom·anio East Garo Hills a·jani Judicial Magistrate VN Sangma, bilsi sokgija bia ka·ani namgijanirangko aro Advocate Talse Sangma, POCSO Act-ni bidingo agan-talate on·angskaaha.
Ia program-ko ong·atanio dingtangmancha COVID-19-ni tikarangkoba su·e on·angjolaha, jeon tika su·srangkugijagipa manderang, tikarangko su·e ra·rikna gita cholko man·aha.