TURA: Garo Hills-ni B Mahal ning·o donggipa biaprangni bidingo GHADC-ni chief executive membor (CEM) Benedic R Marak, adita salrangna skang tom·aniko ong·atenba manderangko dilsretna jotton ka·aha ine matnangenba, Sombar salo ‘Save B Mahal’ committee-ni gita jinma tom·bimonganiko North Garo Hills a·jani Hatogaon songo ong·atangaha.
B Mahal-ni ning·o donggipa manderangni a·arangko ra·seke GHADC-ni CEM, dingtang dingtang kamrangko a·bachengatna miksongenga aro ua ia biapni bidingo manderangna ma·sisretaniko on·na jotton ka·engani gimin jegale ia jinma tom·bimonganiko ong·atangaha ine Garoland State Movement Committee (GSMC) Pedaldoba regional unit parakataha.
Ia ‘Save B Mahal’ committee-ko dilgiparangni u·iatani gitade, adita salrangna skang, GHADC-ni CEM, doltangna kam ka·enggipa manderang baksa Pedaldoba Secondary School kal·chakramo tom·aniko ong·atangenba, ia B Mahal-ni bidingo manderangna ma·sisretaniko on·enga ine NGO-rangko matnangangahachim. Ia tom·aniko ong·atani bidingo GHADC-ni CEM, NGO-rangna aro ia committee-nade u·iatgijasa ong·ataiahani gimin NGO-rang bakko ra·pana man·jaha ineba committee-ni dilgiparang parakataha.
B Mahal-ni ning·o donggipa a·arangko GHADC-ni CEM Benedic Marak, Israel a·songni Agricultural Company-na palna miksongenga aro ia biaprango ua an·tangni man·gninasa solar park aro GPS coordination-ko kulina miksongenga ine ia jolrango donggipa dingtang dingtang dolrang aro jolo songdongenggipa manderang matnangtokengachim.
B Mahal-ni ning·o donggipa a·arangara GHADC-ni ong·ja aro jolo songdongenggipa manderangnisa ong·a aro GHADC-de ia jolrangko aro jolo songdongenggipa manderangko nirokgipa gitasan ong·aia ineba dingtang dingtang dolrang a·kangtokengachim.
Indake ong·engon, iani bidingo ‘Save B Mahal’ committee aro jolo songdongenggipa manderang, GHADC CEM-ni kosako Meghalaya High Court-na ijahar ka·na gitaba manchiangaha.
