SHILLONG: Meghalaya aro Assam a·dok damgnini simarango ru·uta bilsirangonin meligrikna gita man·jaengon, ia meligrikna man·jaenggipa biaprangoni Langpih songona mijal Mongolbar salo, Meghalaya aro Assam a·dok damgnini chief minister-rang re·ange songni nokni manderang baksa tom·aniko ong·atangaha.
A·dok damgnini simarango meligrikgijanirangko namatna gita apsan ja·ku de·chakatengani gimin Assam-ni Chief Minister Himanra Biswa Sarma-ko mittelpile aganangengon, ian a·dok damgnini gisepo ru·utbea bilsirangna meligrikna man·jaenganiko namatna gita ja·ku de·chakatani ong·enga maina indita bilsirangna ia jolrango dolgni meligrikna man·jaengani a·sel ia jolrango songdongenggipa manderang bang·a neng·nikanirangko chakna nangtokengaha ine Meghalaya a·dokni Chief Minister Conrad Sangma parakataha.
“A·dok damgnini gisepo meligrikna man·jae so·sojengjeng ong·anirangko nikna man·engani giminsa a·dok damgnini chief minister-rang, ia meligrikgijaniko namatna aro a·dok damgnini gisepo meli-nangrimaniko ra·bapilna apsan nangrime kam ka·enga,” ine Conrad Sangma aganaha.
A·dok damgnini simarango meligrikgijaniko namataniara altua kam ong·jawa ine janapatengon, ian chengoni ong·baenggipa obostasa ong·engani gimin ia neng·nikanirangko namatna kam ka·anio somoirangkode nangkuaigen indiba a·dok damgnini dilgiparangan da·o ia neng·nikaniko namatna kang·kare kaaha ine Meghalaya a·dokni Chief Minister parakataha.
“A·dok damgnini simarango meligrikgijaniko Shillong songjinmao donge kam ka·anichide namatna man·jawa aro ia sorkaride gitcham sorkarirang gita ong·gija, a·dok damgnini gisepo meligrikgijaniko namatna ka·dongen kamrangko ka·enga,” ineba Sangma Opposition dolrangko matnange aganaha.
Meghalaya aro Assam a·dok damgnini regional committee-rang, meligrikna man·jaenggipa damdok biaprangona re·ange niemanaha ine janapatengon, ia regional committee-rangni report-ko da·o re·baenggipa November 30 tarikni gisepon sorkaritangtangna sokatchina ge·etaniko on·manaha ine Sangma parakataha.
Meghalaya aro Assam a·dokni gisepo meligrikna man·jaenggipa gimik dam 12 biaprang gnang aro ia dam 12-oni damdokko namatchengna gita skanggipa bako kam ka·enga ine talatangengon, ia kamrangko Assam aro Meghalaya sorkarirang, December 31 tarikni gisepode matchotna ka·dongenga ine Sangma parakataha.
Langpih-ona re·anganio Assam-ni Chief Minister Himanta Biswa Sarma-ba manderangna aganprakengon, ru·uta bilsirangonin ia jolrango dolsa dolgipin baksa meligrikna man·jae so·sojengjeng ong·anirangko nikna man·engani gimin ia a·dok damgnini sorkarirang, ia meligrikgijaniko namatna nangrime ja·ku de·chakataha ine parakataha.
Indake ong·genchimoba, Langpih jolrangni giminde committee-rang name am·sandichengna nangengani gimin ia jolrangkode gnigipa bakosa jako ra·gen ine Assam Chief Minister parakatskaaha.
Assam aro Meghalaya a·dok damgnini simarango meligrikna man·jaenggipa gimik dam 12 biaprangara, Upper Tarabari, Gizang Reserve Forest, Hahim jol, Langpih jol, Bordwar jol, Nongwah Mawtamur jol, Pilangkata Khanapara jol, Deshdemoria jol, Khanduli jol, Umkhyrni Psiar jol, Block I aro Block II baksana Ratacherra jolrang ong·achim.
Ia dam 12 biaprangoni damdok biaprangko skanggipa bako namatchengna a·dok damgnini chief minister-rang tik ka·manahachim aro ia biaprangara, Meghalaya a·dokni West Khasi Hills, Ri Bhoi aro East Jaintia Hills a·jani ning·o donggipa Tarabari, Gizang, Hahim, Boklapara, Khanapara-Pilangkata, Ratacherra aro Assam a·dokchipakni Cachar, Kamrup Metro aro Kamrup a·jarang ong·engachim.
