SHILLONG: India a·song gimikon game ge·e cha·enggipa manderangni jegaltokenggipa minggittam farm law-rangko ma·mong sorkarini ra·pilna tik ka·angani ja·man, game ge·e cha·enggiparangna chakpaaniko on·enggipa Meghalaya a·dokni Governor Satya Pal Malik-ba iana ma·mong sorkariko mittelpilataha aro ua game ge·e cha·enggiparang baksa bakrimangkugen ine parakataha.
“Ia niamrangko ra·pilahani anga Prime Minister-ko mittelpilna ska aro ru·utbea somoirangna maming so·sojengjeng ong·ata gri tom·tome jegalanirangko dakahani gimin anga game ge·e cha·enggiparangkoba mittelpilna ska,” ine Sukrobar salo, a·dokni Governor, New Delhi-oni ku·siliting gita aganataha.
Ia farm law-rangko bilsisa batpile game ge·e cha·enggiparangni jegalanio a·dokni Governor an·tangba sorkarini kosako matnanganirangko dakgija, game ge·e cha·enggiparangni dabianirangko knachakchina gitasa a·songni Prime Minister-ko didiskaahachim.
Ia minggittam farm law-rangko ma·mong sorkari ra·pilgnok ine Sukrobar pringo a·songni Prime Minister Narendra Modi parakatenba, jingjengatenggipa manderangko an·tangtangni a·barangona aro noktangtangona re·angpilchina mol·molatahachim.
Ia niamrangko ma·mong sorkari, ia jani gisepon Parliament-ni winter session-ko ong·atanio ra·galpilgnok ine Prime Minister Modi, Gurpurab-na a·songna aganprakatengmiting somoio parakatahachim.