TURA: A·gilsak gimikni dam 135 a·songrang baksana Tura-ni Don Bosco College-oba salgnina ‘Don Bosco Global Youth Film Festival’ (DBGYFF)-ko ong·atangaha aro ia program-ko Bristibar salo, West Garo Hills a·jani Additional Deputy Commissioner Mary T Sangma, a·bachengate on·angaha.
Ia DBGYFF-ko a·bachengate on·anganio Mary T Sangma, jinmana aganprakengon, iandakgipa kan·dikgipa jawilwatrangan chatro chatrirangni janggi tanganiko dingtangatna man·gipa ong·a ine ia film festival-o mesokgipa jawilwatrangoniko skie ra·china gita chatro chatrirangko didiangaha.
Mande dal·gipa ong·na skani donggenchimode mamingan ong·na amgijani dongja ine janapatengon, chatro chatrirangko songsalna on·gilgiparang ong·china gita Sangma didiangaha.
Ia program-ko ong·atanio Tura Don Bosco College-ni Principal Fr Bivan Rodriques Mukhim-ba jinmana aganprakangengon, iandakgipa jawilwatrangchi chatro chatrirangni janggi tangani dingtanggipa ong·china ine an·tangni skaniko parakangaha.
Ia DBGYFF-ko Sukrobar salo matchotataha aro ia salgnini gisepo ming 110 kan·dikgipa jawilwatrangko mesokangaha.
