TURA: Sukrobar salo, Deen Dayal Upadhyaya-Grameen Kaushalya Yojna (DDU-GKY)-ni ning·o, UISS-ni Residential Training Centre-ko Meghalaya a·dokni Chief Minister Conrad Sangma, Dakopgre-o donggipa Extension Training Centre-o nokdonggae on·angaha.
Ia training centre-ko nokdonggae on·angani somoio West Garo Hills a·jani Deputy Commissioner Ram Singh aro gipin official-rangba dongpae bak ra·angaha.
Ia Residential Training Centre-ko nokdonggae on·anganio a·dokni Chief Minister, jinmana aganprakangengon, IT, soft skills, communication aro uandakgipa kamrangni a·bao kam ka·ani cholrang baksa a·songni dingtang dingtang biaprango donggipa chadamberangna skie on·na gita training program-rangko ong·atenga ine parakangaha.
Meghalaya sorkariba, ‘One Skill One Talent’ minggipa skill development program-ko ra·gatna sienga aro ia program-ko mikkang bilsini January aro February jani gisepo a·bachengatgen ineba Chief Minister parakangaha.
Training-o donge skie ra·engon, gisiko nange skie ra·china gita skie ra·enggipa manderangko didiangengon, DDU-GKY-na pilak nanga dakchakanirangko sorkari on·gen ine Chief Minister, ku·rachakaniko on·angaha.
Ia tom·anio West Garo Hills a·jani Deputy Commissioner Ram Singh-ba jinmana aganprakengon, an·tangtangni bading chiwalanirangko a·bachengna man·na gita dingtang dingtang biaprangona re·ange u·i-ma·siani aro changa sapanirang baksa re·bapilchina chatro chatrirangko didiangaha.
Ia tom·anio SIRD-ni CEO JC Lohani, DDU-GKY-ni kamrangni bidingo talataniko on·angengon, ia training centre-o Basic IT, Soft Skills, Communication aro uandakgipa kamrangni gimin skie on·gen ine parakangaha.
Ia apsan salon, a·dokni Chief Minister, Bidanchi High School aro Dobasipara High School-o Green Computer Lab-rang baksana Smart Classroom-rangko kulie on·angaha aro Tura-o Apollo Clinic-koba kulie on·angjolaha.
