TURA: B Mahal-ni ning·o Garo Hills Autonomous District Council (GHADC)-ni gita ra·gatna sienggipa kamrangni bidingo adita salrangna skang, GHADC-ni secretary agan-talataniko on·angahaoba, uamangni agan-talataniko on·anio chu·gimikkode talatjaha ine GSMC Pedaldoba unit parakatenba, iani bidingo jolni NGO-rang aro jolo songdongenggipa manderang raken jegalangkugen ine GSMC Pedaldoba unit-ni chairman Rimjen Sangma parakataha.
Iani bidingo kobor setimgiparangna seachi parakatengon, jolo songdongenggipa manderang aro jolni NGO-rang, ia biaprangona ra·baenggipa development project-rangko jegalenga ong·ja indiba B Mahal ning·o donggipa nokdangrangna GHADC-ni on·na miksongenggipa one time settlement-ni bidingo talataniko on·jahani giminsa suk ong·ja ine GSMC Pedaldoba unit parakataha.
GSMC Pedaldoba unit-ni parakatani gitade, GHADC-ni ra·na miksongenggipa biaprango songdongenggipa nokdangrangna bigha gni ka·e on·e, ia nokdangrangoniko gong 40,000 ka·e gamchina dabiskaengachim indiba iani bidingode GHADC-ni dilgiparang, maming talatanirangko on·skajahachim.
“Iani giminde maina GHADC-ni Secretary talataniko on·na man·jaha? November 6 tariko jinma tom·aniko ong·ate manderangna talataniko on·ani ja·man songni manderang GHADC-ni kamko ra·chaktokaha ineba GHADC talataniko on·aha indiba ia tom·anio bak ra·giparangoni bang·batan A Mahal jolrango songdongenggipa manderangsa ong·achim,” ine Rimjen Sangma talataniko on·angenba, iandake GHADC-ni ja·ku de·aniko B Mahal jolrango songdongenggipa manderangde da·oba jegaltokengkua aro iani giminsa November 15 tariko Hatogaon songo tom·aniko ong·attaiaha ine parakataha.
High Court-o ijahar ka·na gita ia tom·anio jinma tik ka·e donangaha ine janapatengon, B Mahal-ni ning·o GHADC-ni ja·ku de·na manchiengako ra·pilkujaskal, uamang GHADC-ni kosako raken jegalangkugen ine GSMC Pedaldoba unit-ni chairman parakataha.
