SHILLONG: Re·anggipa Sonibar salo, Ri Bhoi a·jani Umsning C&RD Block-ni gita ong·atanggipa SHG Mega Event-cum-Health Mela-ko Meghalaya a·dokni Chief Minister Conrad Sangma, Umiam Khwan-o donggipa Union Christian College-o a·bachengate on·angaha aro ia program-ko ong·atanio Rajya Sabha MP Dr WR Kharlukhi, a·dokni PWD (Building) Minister Dasakhiatbha Lamare, Umsning-ni MLA Jason Sawkmie Mawlong, jolni MDC-rang aro gipin official-rangba dongpae bak ra·angaha.
Ia program-ko a·bachengate on·angani somoio a·dokni Chief Minister jinmana aganprakangengon, self help group (SHG)-rangni gamchatgipa ong·ani bidingo agan-talate on·angenba, SHG-rango bak ra·gipa manderangna nambata janggi tangani cholrangko on·na gita sorkari kam ka·enga ine parakangaha.
A·doko SHG-rangna kam ka·anio chu·sokgipa ong·anian ia sorkarini mongsonggipa chu·sokatgipa kamrangoni mingsa ong·enga ine janapatengon, a·doko SHG-rang dol 6000-mangsan dongaiachim indiba da·o SHG-rang dol 36,000-ona tang·doangaha aro bilsisani gisepon a·dokni SHG-rangko dol 42,000-ona tang·doatna gita sorkari nisanko donenga ine Chief Minister parakataha.
“Chingni iandake SHG-rangna kam ka·anio chu·sokgipa ong·enganichi da·o lak 3.5-na baten me·chikrang, sorkarini ra·gate on·gipa scheme aro program-rangchi namgnirangko man·engaha aro iana an·ching pilakan kusi ong·na nanga,” ine Sangma aganaha.
