TURA: Komilaoniko ma·manti cha·ani ringani bosturangko tarina skie on·na gita adita salrangna skang, Tura-o donggipa Community Science College-ni Food Science & Nutrition Department-ni gita salbrina training program-ko ong·atangaha.
Ia program-ko ong·atna gita Meghalaya sorkarini ning·o donggipa Directorate of Food Processing, PM FME Scheme-ni ning·o tangka paisarangko dakchake on·aha aro ia training program-o bak ra·gipa manderangna theory baksana practical-rangkoba ra·angaha.
Ia program-ko ong·atani bidingo Community Science College-ni Assistant Professor Natasha R Marak, talataniko on·angengon, ia training program-ko ong·atani ja·mano, skie ra·giparangko New Delhi-oni expert-rang, internet gita porikka ra·e niangaha ine parakataha.
Ia salbrina ong·atanggipa training program-o ATMA-ni official-rang, chong·motan Dr Sequin R Marak aro Siera M Sangma, dingtang dingtang kamrangni bidingo agan-skie on·angaha.
Ia training program-o sak 30 manderang dongpae skie ra·na cholko man·aha aro uamangko West Garo Hills a·jani District Horticulture Officer seokangenba, komila juice, jam aro uandakgipa ma·manti cha·ani ringanirangko tariani bidingo skie on·angaha.