TURA: Nokantion dam komigipa nokko rike on·na gita a·songni Prime Minister Narendra Modi-ni ku·rachake ra·gatgipa Pradhan Mantri Awas Yojana (Urban)-ko Meghalaya sorkari name jakkaljaenga ine Tura-ni BJP MDC Bernard N Marak matnangataha.
“Pilak kangal cholgri nokdangrangnan pucca nokrangko man·na nanga ine PM Modi-ni ku·rachakaniko man·e manderang ka·donganirangko man·tokahachim indiba Meghalaya a·dokode man·e cha·gipa aro bilakgipa manderangsa kangal cholgrirangna ra·gatgipa scheme-ko ra·e katskaenga. Kangal cholgrirangna dam komiani nokrangko rike on·na gita ma·mong sorkari, gong krorni kror tangkarangko chamatahaoba ia scheme-ko a·dok sorkari ja·manchakatahani a·sel chu·sokgipa ong·jawa,” ine Marak parakataha.
A·dok sorkarini simsakjani a·selan ia scheme-ko a·doko a·bachengatchipna man·jaenga ine janapatengon, iani a·selan Tura jillaoba kangal cholgrirang ia scheme-ko man·tokjaenga ine Tura MDC matnangataha.
“Tura-o sak 1299-mangni gita me·chikrang 2016 bilsion PMAY(U)-na dorgasto galahachim. 2017-18 bilsirango ma·mong sorkari beneficiary sakgittamko, 2018-19 bilsio sak 599-ko aro 2019-20 bilsirango sak 50-ko ra·chake jilla jolrango gimik sak 619 manderang ia scheme-ni namgniko man·na gita seokako man·aha. Ia scheme-ni ning·o Tura jillamangmangnan gong 9,28,50,000-ko chamatahachim indiba iani bidingo angni sing·dokujaskalna ia manderangoni darangnaba u·iatjahachim,” ine Marak parakataha.
Marak-ni parakatani gitade, iani bidingo official-rang, seoka man·gipa manderangna u·iatgija donchipaha aro iani bidingo sing·sandiaton official-rang, saksa sakgipinko jaksi otgrikna a·bachengskaahachim.
“PMAY scheme-ko jako ra·ja ne Municipality jegale MUDA-kosa matnangaha aro ja·mano MUDA baksa agangrikani ja·manosa, ia scheme-ni namgniko man·na seoka man·gipa manderangna kam ka·enggipa manderang u·iate, nokna an·tangtang RCC post-ko songchina aganataha. Indiba ia manderangoni bang·batan kangal cholgrirangsa ong·e RCC post-rangko songna man·jaha maina ia RCC post-rangko songaniara namen dama rakachim. Uni gimin ia pilakan kangal cholgrirangni man·gniko ra·sekna a·dok sorkarini miksongmanchae ru·utatanisa ong·a,” ine Tura-ni MDC parakataha.