SHILLONG: Salgro salaram jolni aro Meghalaya a·dokni political dolrang, New Delhi-ona gilamna re·angronga ine adita salrangna skang BJP-ni dilgipa M Chuba Ao-ni agangipa kattarangko Meghalaya a·dokni Deputy Chief Minister aro NPP-ni dilgipa Prestone Tynsong-ba raken jegalataha aro uni iandake agananiara an·tangko politics-o bregijaniko mesokani gita ong·aha ine parakataha.
Ao-ni agangipa kattarangko jegalatengon, “Ua saksa politics-o namen dambekuenggipasan ong·enga aro skie ra·na nanganirang bang·kuenga,” ine Sombar salo, a·dokni Deputy Chief Minister, kobor ra·timgiparangna parakataha.
Ao-ni agangipa kattarangara maming orto grigipa aro kema bi·na nanggipa kattarang ong·a ine janapatengon, BJP, Congress ba je political dolba ma·mong sorkarionade re·angna nangaia ine Tynsong talataniko on·angaha.
Tynsong-ni aganani gitade, Assam-ni BJP Chief Minister Himanta Biswa Sarma aro BJP-ni gipin dilgiparangba, a·doko namroro silroroaniko ra·bana gita tangka paisarangnade New Delhi-onan re·angengachim.
Meghalaya a·doko ma·mong sorkarini bang·a scheme-rangkon name ra·gatjaenga ine BJP dolni matnangenggipani gimin sing·on, ma·mongni badia scheme-rangko a·doko name ra·gatjaenga, uko talate on·china gita Tynsong, a·dokni BJP dolko didiataha.
“MGNREGA-ni kamrangko chu·sokatani gimin agangenchimode India a·song gimiko Meghalaya a·dokan nambatgipa ong·enga aro Jal Jeevan Mission-oba chinga kraa gitan namen kamko ka·enga,” ine a·dokni Deputy Chief Minister talataniko on·angaha.
A·songni gita biming donggipa a·dokni political dolrang, New Delhi-ona bi·amna re·angronga ine Sonibar salo, BJP-ni dilgipa M Chuba Ao matnange aganahachim ine nikna man·a.
“Ia regional party-rango mingsa dakbewal gnang aro uan New Delhi-ona bi·amna re·angani ong·a aro Delhi-oni re·bapilani ja·man uamang maiko dakronga pilakan ma·sia,” ine Ao aganahachim.