TURA: ‘Azadi Ka Amrit Mahotsav’ campaign-ni bak gita Sombar salo, National Food Security Act (NFSA) 2013, ‘One Nation One Ration Card’ aro Consumer Protection Act 2019-ni bidingo awareness program-ko Tura Food Civil Supplies & Consumer Affairs Department-ni gita Tura Dakopgre-o donggipa SMELC conference hall-o ong·atangaha aro ia awareness program-ko ong·atanio a·dokni Food, Civil Supplies & Consumer Affairs Minister James PK Sangma, mongsonggipa sokgipa ong·e bakko ra·angaha.
Ia program-ko ong·atanio James Sangma, jinmana aganprakangengon, Azadi Ka Amrit Mahotasv-ni bak gita NFSA, Consumer Protection Act aro One Nation One Ration Card-ni gimin manderangna ma·siataniko on·enba, manderangni ma·sisretanirangko talate on·na nangchongmota ine didiangaha.
Adita salrangna skangsan, United Nations World Food Organisation aro Meghalaya sorkarini gisepo Memorandum of Understanding (MoU)-o soi ka·grikaha aro mikkangchi jolo songdongenggipa manderangni namgnina bang·bata scheme-rangko sorkari ra·gatgnok ineba Sangma parakataha.
Iana skang, ia program-ko ong·atani bidingo Food Civil Supplies & Consumer Affairs-ni Secretary Pravin Bakshi, talataniko on·angengon, a·doko songdongenggipa manderangoni 77 percent-ni gita NFSA-ni namgnirangko man·aha aro mikkangchiba a·doko songdongenggipa manderangna nambate dangdike on·angkuna gita ia department, dingtang dingtang cholrangko ra·gatenga ine parakangaha.
Ia tom·anio West Garo Hills a·jani Deputy Commissioner Ram Singh-ba dongpae jinmana aganprakengon, a·doko bosturangko bree cha·giparang ong·e an·tangtangna on·gimin bilrangni gimin aro sorkarini on·enggipa scheme aro dingtang dingtang cholrangni gimin ma·sie ra·china gita a·doko songdongenggipa manderangko didiangaha. Ia sal somoirango pilak kamrangnan Aadhar card-ko nangchongmotengaha ine talatangengon, PDS dealer-rangko, PDS-ni bosturangko man·enggipa manderangko, chatro chatrirangko aro pilak ma·a paarangkon Aadhar-na an·tangtangni bimingrangko segatchina gita ua didiangaha.
Ia program-ko ong·atanio dingtangmancha Aadhar-na biming segatani aro Ration Card baksa link ka·anio bang·bate segatna man·ahani gimin Minister-ni jakchi, Dadenggre Civil Sub-Division-ni SDO Jagdish Chelani-na mande ra·pilskaaniko dakangjolaha.
Ia program-ko ong·atanio jinmana agan-talate on·anggipa gipin manderangara, Tura Food Civil Supplies & Consumer Affairs department-ni Superintendent Juniko K Marak, Supply Inspector Naseng D Marak aro gipinrang ong·a.