WILLIAMNAGAR: Re·baenggipa 2022 bilsio Meghalaya a·dokni bilsi 50 gapaniko manina siengani gimin a·dokni bilsi 50 gapaniko maniani bak gita Mongolbar salo Songsak C&RD Block-ni ning·o donggipa National Rural Livelihood Mission (NRLM) baksana dingtang dingtang department-rang aro bank-rang nangrime Mega Block Event-ko Songsak Agalgre songo ong·atangaha.
Ia program-ko ong·atanio DoNER Ministry-ni Deputy Secretary Harish Pokhriyal, mongsonggipa sokgipa ong·e jinmana aganprakangengon, mela gita dakgipa program-rangko ong·ate game ge·e cha·enggipa manderangni man·enggipa bosturangko tang·doatna ja·kurangko de·engani gimin aro sorkarini on·enggipa scheme-rangko ra·e an·tangtangni man·dapanirangko bariatchina gita game ge·e cha·enggiparangko aro self help group (SHG)-rangko didiengani gimin NRLM-ko mittelpilangaha.
Jolo songdongenggipa manderangni nanganirangko chu·sokatna gita ma·mong sorkarini ka·enggipa kamrangni giminba ua ia tom·anio agan-talate on·angaha.
Ia program-ko ong·atanio East Garo Hills a·jani Deputy Commissioner Swapnil Tembe-ba jinmana aganprakangengon, ma·mong sorkarini ra·gate on·enggipa scheme-rangko aro scholarship-rangko ra·na man·na gita an·tangtangko Aadhar-o biming segatchina gita tom·anio bak ra·giparangko didiangaha.
Iana skang, Songsak Block-ni BDO Diana Sangma, tom·bagiparangna rimchaksoani kattarangko aganangengon, ia mela ba Mega Block Event-ko ong·atanio dingtang dingtang department-rang, dingtang dingtang cholrangko on·engani gimin ia cholrangko an·tangtangni namgnirangna ra·china gita songni nokni manderangko didiangaha.
Ia program-ko ong·atanio dol 20 self help group-rangna cheque-rangkoba suale on·angjolaha.
