TURA: Tura Balading-o donggipa Nokma Council building sambao Jio Infratel Pvt Limited-ni mobile tower-ko songani a·sel jolo songdongenggipa manderang neng·nikanirangko man·na nangtokenga ine South Tura-ni gitcham MLA John Leslee K Sangma, FIR ka·doangaha.
Iani bidingo ua November 23 tariko changgni dake FIR ka·doangaha aro uni FIR-o parakani gitade, ia biapo Mobile tower-ko songe an·tangtang lapko man·na gita Nokma Council-ni secretary, West Garo Hills a·jani official-rangna report-ko on·ahachim.
Sangma-ni FIR-o parakatani gitade, ia biap sambaon skul aro hospital-ba dongachim indiba ia mobile tower-na dal·begipa diesel generator-ko salang walang chalaiengani a·sel skul aro hospital-rangosan ong·aigija ia jolrango songdongenggipa manderangba neng·nikanirangko chagrongna nangtokenga.
“Central Pollution Control Board-ni dongimin niam gitade generator-rangko niam gri jakkalna man·jachim aro skul, college, hospital baksana court-rangni metre 100-ni ning·ode a·dok sorkarian ‘silent zone’-ko ra·gatahani gimin iandake gam·gipa bosturangko jakkalaniara niamko pe·ani gita ong·enga,” ine South Tura-ni gitcham MLA parakataha.
Mobile company-oniko an·tangtang lap man·na gitasa ia biapo mobile tower-ko songna gita West Garo Hills a·jani Deputy Commissioner-na kakket ong·gijagipa report-ko on·aha ine janapatengon, Nokma Council secretary-ni kosako nanga gita ja·kurangko de·chinaba Sangma-ni FIR-o didiangaha.
“Ia biapo mobile tower songna am·enga ine ma·sie Balading Development Committee jegalahaoba, Nokma Council-ni secretary, tol·e tarigimin report-ko DC-na on·aha. Ia jolrango donggipa dingtang dingtang gittimrangoniko ua NOC-ko ra·aha ineba Nokma Council-ni secretary a·kangaha indiba ua PWD colony development committee-ni NOC-kode on·jaha,” ine South Tura-ni gitcham MLA parakataha.
