TURA: Adhoc skulrangko deficit-ni gadangona ra·doatchina gita batanggimin somoirangnin sorkarina lekkarangko sedoe dabianirangko dakengoba da·onan ia dabianiko chu·sokate on·na gisiko nangjaenga ine Meghalaya Upper Primary School Teachers Association (MUPSTA) Garo Hills Region parakatenba, iani bidingo sorkarini kamko jegalna gita re·baenggipa December 3 tariko skigiparang jinma tom·bimonganiko Asanang-o ong·atenga ine u·iataha.
MUPSTA-GHR-ni parakatani gitade, iani bidingo association-ni dilgiparang, bilsi gittamna skangan sorkarina memorandum-rangko on·e, a·dokni Chief Minister, Education Minister, Union Human Resource Minister aro Union Social Justice & Empowerment (NE in-charge)-naba changni chang gisik ra·ataniko on·angahachim indiba da·alonan adhoc skulrangko deficit-ni gadangona ra·doatchina dabianiko sorkari knachakkujaengachim.
“Chingni dabianirangko da·onan chu·sokate on·kujaengani gimin re·anggipa November 17 tariko chinga finance commissioner-ko Secretariat-o gronge agangrikahachim indiba uko gronganio uni aganchakanirangara chingko batesa gisik saataha,” ine MUPSTA-GHR-ni president SR Marak parakataha.
Marak-ni parakatani gitade, finance commissioner-ko uamangni grongeon ua ‘proposal sokbaa gimikko anga soi ka·genchimode Meghalaya sorkaride tangka paisa gri ong·gnok’ inesa aganchakatahachim.
“Adhoc UP skulrango skigiparang, indita bilsirangna senge an·tangtangni dabianirangko chu·sokatchina sorkariko mol·molengachim indiba sorkarini gisiko nangteljaengani gimin chinga re·baenggipa November 3 tariko jinma tom·bimongna tik ka·aha. Ia tom·bimonganio chinga mikkangchi maiko dakode namgen, uko chanchie ja·kuko de·anggen,” ine MUPSTA-GHR-ni president parakataha.