SHILLONG: Meghalaya a·doko COVID-19-na tika su·aniko da·o Krismasna skangan sorkari matchotatna krengengon, a·dok gimiko tika su·anirang South West Garo Hills a·jao nambatgipa ong·enga ine sorkari official-rang parakataha.
Health department-ni Principal Secretary Sampath Kumar-ni parakatani gitade, Meghalaya a·dok gimiko COVID-19-na tika su·ani South West Garo Hills a·ja nambatgipa ong·enga aro uni ja·man East Jaintia Hills aro West Garo Hills a·ja ong·skaenga.
“COVID-na tika su·ani South West Garo Hills a·jao chu·sokgipa ong·engani gimin chinga Krismasna skang tika su·aniko matchotatna ka·dongenga,” ine Sampath Kumar, kobor ra·timgiparangna aganaha.
South West Garo Hills a·jao tika su·na kam ka·ani bewalko skie ra·na man·aha aro ia a·jao su·ani bewalko ja·rike a·doko tika su·aniko chu·sokgipa ong·atna man·gen ineba ua aganaha.
Health official-ni parakatani gitade, South West Garo Hills a·jao district administration aro health official-rang, manderangna tikani bidingo dontonggija agan-talatanirangko on·e tika su·anio chu·sokgipa ong·aha.
“Nokantiona re·roroe ia tikani bidingo agan-talate on·anirangko dakanichi South West Garo Hills a·jao chu·sokgipa ong·aha. Da·o tika su·kugijagipa manderangde songadam nokadamrangosa ong·batengaha aro uamangba da·o tikarangko su·e ra·na kusi ong·tokengaha,” ine Kumar parakataha.
Field worker-rangni rakbee kamrangko ka·ani a·sel da·o tika su·ani komibatenggipa a·jarangoba tika su·ani tang·dobaengaha ineba ua aganaha.
Official-rangni see rakkianiko parakatani gitade, re·anggipa Mongolbar salona kingking Meghalaya a·doko COVID-ni pong 19,35,506 tikarangko su·na man·aha aro ianoni pong 11,52,635 tikarangde skanggipa pong ong·a.
