SHILLONG: Congress doloni ong·katgipa sak 12 MLA-rang, an·tangtang bilgri ong·ahani giminsa bilna mikpama nie ong·kataha ine Bristibar salo Meghalaya Pradesh Congress Committee (MPCC)-ni president Vincent H Pala aro Congress MLA Ampareen Lyngdoh matnangatenba, Meghalaya a·doko Congress dolko ra·dopilna gita uamang rake kam ka·gen ine parakataha.
A·dokni gitcham chief minister Mukul Sangma-ko man·chape Congress dolni sak 12 MLA-rang, re·anggipa Budbar walon Congress-oni ong·kate Trinamool Congress (TMC)-o napangskaahachim ine nikna man·a.
Indake ong·engon, sak 12 MLA-rangni ong·katanichi Meghalaya a·doko Congress dol bilgriangjawa aro batesa da·o kakket ong·gipa dilgiparangko rimbaskae Congress dolko bilakbatatna kamko ka·anggen ine MPCC-ni president Pala aro Congress MLA Ampareen Lyngdoh parakataha.
Congress doloni ong·kate katgipa bang·bata MLA-rangkon uamang a·bachengonin ong·katna miksonganirang donga ine ma·sisoachim ine janapatengon, Nongthymmai-ni MLA Charles Pyngrope-ni ong·kataninasa uamang namen aiao inmanaha ine Pala parakataha.
An·tangko MPCC-ni president songani gimin ong·kata ine pa·sikaniara kakket ong·ja ine janapatengon, ia dilgiparang skangonin bilko jakkalgiparangsa ong·e da·o an·tangtang bilgri ong·ani gimin bilna mikpakma niesa ong·kataha ine Pala parakataha.
“Anga an·tangde an·tangko MPCC-ni president songa ong·ja indiba Congress MLA-rang aro MDC-rang an·tangtangsa dingtanganiko nangnike angko songaha. Angko MPCC-ni president songna skangba AICC-ni dilgiparang, changni chang a·dokni dilgiparang baksa agangrikchengahachim. Uni gimin ia pa·sikaniara kakket ong·ja aro uamang an·tangtangsa bilna mikboke ong·kataha,” ine MPCC-ni president parakataha.
A·bachengonin ia MLA-rang ong·katna miksonganirang donga ine ua ma·sisoani gimin Congress dolko bilakatna gita rake kamrangko ka·soahachim ineba Pala aganaha.
Indake ong·engon, ia MLA-rangni ong·kataniara a·doko namgipa dilgiparangko rimbana aro nambate kamrangko ka·na cholko on·ani gita ong·skagen ine Congress MLA Ampareen Lyngdoh-ba parakataha.
“Dolsaoni dolsaona katjojogipa dilgiparangni a·selan an·chingni a·doko namroro silroroani dongjaenga. Uni gimin da·o election-o a·dokni manderang dingtanganiko nangenga ong·ode dingtanganina pu·onchina. Da·o ian an·tangko palgijagipa aro katjojoe donggijagipa chadamberangko rimbaskana chol ong·enga,” ine Lyngdoh aganaha.