TURA: Chengjora-oni Chamaguri gita Anderkhona-ona PMGSY ramako tariani namsrangjaenga ine A·chik Youth Welfare Organisation (AYWO) Garobadha regional branch matnangataha.
AYWO Garobadha regional branch-ni president Mekensing Sangma-ni parakatani gitade, ia ramako tarianio jakkalenggipa ro·ong aro gipin bosturangara dongimin niamo gita ong·jaengachim aro ia ramao anenggipa ro·ongrangara jetgimin ro·ongrang ong·jachim.
“Dongimin niam gitade ramarangko tarianio pangnan jetgimin ro·ongrangkosa jakkalna nangachim indiba chingni ramako nieanio nikani gitade, ia ramako tarigipa contractor, niamrangko ja·rikgijasa ia ramako tariahachim,” ine AYWO Garobadha branch-ni president parakataha.
Ia ramako tarianio jakkalgipa ro·ongrangko contractor-rang, sambao donggipa chiring chibisikrangonikosa bikote ra·baaha aro ian chiring chibisikna aro chio donggipa na·tok na·batrangna mikkangchi namgijaniko ong·atani gita ong·gen ineba AYWO Garobadha branch parakataha.
