TURA: Ia 2021 bilsini National Eligibility & Entrance Test (NEET) porikkako seanio Tura-oni A·chik chatri saksa 517 mark-rangko man·e A·chik jatna aro Garo Hills-na mikkim rasongko ra·baaha.
Ia chatriara Tura Goanang-oni Bester R Marak aro Luthfa D Shira-ni demechik Crishell Oricco D Shira ong·a aro ua ia NEET porikkako seanio 95.41 percent-ko man·e chu·sokgipa ong·aha.
Crishell Oricco D Shira-ra, Tura Sherwood School-ni gitcham chatri ong·achim aro uni ia porikkako seanio teng·sugipa ong·ahani gimin uni nokdangsan ong·aigija, uni skigiparang aro West Garo Hills a·jani Deputy Commissioner Ram Singh-ba una mittelpilaniko parakataha.
“Crishell-na uni ma·a paarangna aro skigiparangna anga angni namgipa skaniko on·na ska. Skani donggenchimode mandena mamingba ong·na amgijani dongja aro bimchipe kamko ka·genchimode mande pilak kamon chu·sokgipa ong·na man·a. Crishell-ni chu·sokgipa ong·aniara Garo Hills-ni chadamberangna aro ia porikkako sena sikenggipa chatro chatrirangna didiani ong·chongmotaha. Uni mikkangchi poraianirango aro kam ka·anirango chu·sokgipa ong·angchina chinga una namgipa skaniko on·enga. Isol una pattiangkuchina,” ine West Garo Hills a·jani Deputy Commissioner Ram Singh, social media-o parakataha.
