SHILLONG: Meghalaya a·doko donggipa autonomous district council (ADC)-rangoniko a·dok sorkari, tangka paisarangko cha·una jotton ka·enga ine Tura-ni BJP MDC aro BJP-ni state vice president Bernard N Marak matnangataha.
Marak-ni parakatani gitade, district council-rango Trading for Non Tribal (TNT) kajinako a·dok sorkari, an·tangni man·gninasa bariatna jotton ka·enga aro ian district council-ni tangka paisarangko cha·una jotton ka·ani gita ong·enga.
“TNT-ni kajinarangko mitam biaprangode gong 1000-oniko gong 10,000/-ona bariataha aro ianoniko a·dok sorkari, 40 ba 50 percent-kode man·rikengani gimin ian a·dok sorkarini, district council-rangoniko tangka paisa cha·uani gita ong·enga. Ia kamara gitcham secretary-ni dakdilgipa kaman ong·a,” ine Marak, Robibar salo parakataha.
Meghalaya a·dokara Sixth Schedule a·jaosa ga·akani gimin a·dok sorkari, manderangoniko kajina ra·na man·jae, district council-rangonikosa ra·sekna jotton ka·skaenga ineba Tura-ni BJP MDC matnangataha.
“Anga an·tangde iako a·bachengonin jegalenga indiba uamang iako manderang baksa agangrikchenggija ia Bill-ko pass ka·na jotton ka·enga,” ine Marak parakataha.
Maming niam gri aro Governor-ni ra·chakani gri maikai sorkari, batanggimin bilsignina kajinarangko ra·na man·aha ineba Marak sing·doangaha.
“Uamang bilsignina maming niam gri kajinarangko ra·engaha aro ian sorkarini, district council-oniko tangka cha·uani gita ong·enga,” ine Tura MDC parakataha.
