TURA: Re·anggipa Sonibar salo, Tura-ni Don Bosco College-o NCC Day-ko maniani bak gita an·chirangko on·gilangtokaha.
Ia program-ko Tura-ni Blood Bank baksa nangrime ong·atangaha aro ia program-ko West Garo Hills a·jani Deputy Commissioner Ram Singh, mongsonggipa sokgipa ong·e a·bachengate on·angaha.
Ia program-ko a·bachengate on·anganio West Garo Hills a·jani Deputy Commissioner, jinmana aganprakangengon, songsalna aro ia college-na an·tangtangko on·kange dangdike on·giparang ong·china gita Don Bosco College-ni NCC cadet-rangko didiangaha.
Meghalaya a·doko aro mongsongbate sima ari jolrangoba NCC giproroengaha ine janapangengon, NCC-ni giprorobaenganichi Garo Hills-ni pilak skul aro college-rangoba NCC giprorobaengaha aro ian namgipa chin ong·a ine Singh parakataha.
India a·songo pekgipa bostu jakkalaniko bon·atsrangna gita ma·mong sorkarini ra·gatgipa Nasha Mukt Bharat Abhiyan-ni gimin NCC-ni cadet-rangna talataniko on·angengon, chatro chatriskarangna aro uamangni salantion grongenggipa manderangna namgipa bewalko mesoke dakmesokgiparang ong·china gita Singh, NCC cadet-rangko didiangaha.
Ia program-rangko ong·ate an·chirangko on·gilgrimahani gimin ua dingtangmancha Tura Don Bosco College-koba mittelpilangaha.
Ia program-ko ong·atanio Blood Bank, West Garo Hills-ni official-in-charge Dr SK Marak-ba dongpae jinmana aganprakengon, manderangni janggirangko jokatna gita an·chirangko on·gilna nangani gimin aganangskaaha.
Ia program-ko ong·atanio sak 30-na baten NCC cadet-rang, an·tangtangni gamchatbegipa an·chirangko on·gilangtokaha.
Don Bosco College-o NCC Day-ko maniani bak gita an·chirangko on·gila
Date:
Share post:
