SHILLONG: Meghalaya a·doko Congress doloni ong·kate All India Trinamool Congress (AITC)-o napanggipa sak 12 MLA-rang, da·al Sombar salni bako Kolkata-ona re·ange Trinamool Congress-ni president Mamata Banerjee-ko grongenaba gnang ine kobor on·aha.
Meghalaya a·doko gitcham chief minister Mukul Sangma-ko man·chape Congress dolni sak 12 MLA-rang AITC-ko napangskaani ja·man AITC Meghalaya unit-ni secretary-na Mawsynram-ni MLA HM Shangpliang-ko seokaha aro AITC Meghalaya unit-ni parliamentary party leader-na Mukul Sangma-ko seoke Umroi-ni MLA George Lyngdoh-ko chief whip songskaahachim.
Meghalaya a·doko da·o Congress dolni bang·bata dilgiparangan AITC-o napskaahani gimin AITC dolan, mongsonggipa opposition dol ong·engahachim.
“Sombar salo, Trinamool Congress-ni dilgipa Mamata Banerjee-ko grongna chingko chingni dilgipa Mukul Sangma Kolkata-ona re·dilangenga. Banerjee-ko gronge chinga Meghalaya a·doko AITC-ko dal·dapatani gimin chanchirimanggen,” ine Meghalaya a·doko AITC-ni secretary ong·enggipa HM Shangpliang, kobor ra·timgiparangna parakataha.
Uo ka·donge uko AITC Meghalaya unit-ni parliamentary dilgipa songahani gimin Mukul Sangma-ba AITC-ni membor-rangko mittelpilangskaaha. Uamango ka·donge uamangko MLA-na seokgipa manderangni nangnikanirangko chu·sokate on·angkuna gitaba Sangma, ku·rachakaniko on·ataha.