SHILLONG: Indo-Bangladesh sima ari gita bobil dakgiparangni napruraaniko, silchidare badingsrukaniko, drugs aro mande badingsrukanirangko mamingdakeba watpakani dongjawa ine Border Guards Bangladesh (BGB) Sombaro aganaha.
Border Security Force (BSF) baksa Shillongo salgittamna ong·atgipa commander-level conference-ni bon·kamgipa salni tom·anio mijalo Additional Director General Tanveer Gani Choudhury-ni dilbagipa dolsa BGB delegation ku·rachakangaha.
Tom·anio, Indiachipakni gita Meghalaya, Tripura, Mizoram aro Silchar frontier-rangni BSF-ni inspector general-rang bakko ra·angaha.
‘‘Sima ari gita bobil dakgiparangni napruraaniko, silchidare badingsrukaniko, drugs aro mande badingsrukanirangko chinga mamingdakeba watpakja. Sima arini bidingo mitam mamlarangni bidingo ning·tuen chanchiaha aro sima ari gita batsotgrike ong·gija kam ka·anirangko bon·atna kam ka·gen’’ ineba Choudhury koborni manderangna aganaha.
Unomitingo, kamtangko ka·mitingo Bangladesh-ni denggu dakgipa manderangni, BSF dolko aro Indiani ramram manderangko chadrapaniko, BSF rakgen jegale aganaha.
Tripura Frontier-ni BSF Inspector General, S K Nath, jean Indian delegation-ko skotong ong·e chanchidilahachim, ‘‘uamangni tom·anio chel·chak-naljokani bidingo chanchirimaha aroba Bangladesh-o ma·chakenggipa Meghalaya aro Tripura-ni bobil dolrangni list ba bimingrangkoba BGB-na pakwatataha aro uamangni kosako kam ka·china gitaba uamangko mol·molataha.
Indake Bangladesh-o, ia bobil dolrangni pangkamgipa camps ba a·tiprang dongja, indiba haida uamangna dakchakgiparango ma·chakengnaba donga ine BGB aganaha. Unigisepon bobil dolrangni kosako kam ka·na gita BGB ku·rachakani kattarangko parakangaha.
