TURA: Garo Hills Autonomous District Council-o Chief Executive Membor Benedic R Marak-ni chalaidilenggipa NPP dol baksa bakrime council-ko rikenggipa United Democratic Party (UDP) dol-o Congress dolni gitcham MDC Ashahel D Shira-ni bakrimeanichi council-o bilakbataiaha.
Ashahel D Shira, Garo Hills-ni UDP dilgiparang baksa mijal attamo CEM Benedic R Marak aro Chairman Rakesh A Sangma mangko gronge NPP-ni chalaienggipa bakrimgipa dolna chakpaani chittiko on·aha.
“Ua (Ashahel) CEM Benedic R Marak-ni Executive committee-na chakpaaniko da·alo on·aha. Iani bidingo manchiani CEM-ni jakosa ong·gen,” ine chittiko Shira-ni pakwateani ja·man Chairman Rakesh A Sangma aganaha.
UDP dol, ia bilsini April jao GHADC polls-o susaanio ge·sa seatrangkoba man·jaha indake ia bilsini October 30 tariko ong·atgipa Rajabala by-elections-na skang mangmang Ashahel D Shira-ni dolo napanichi sak 30 membor house-o biap man·eaha.
Re·anggimin Rajabala by-elections-o Ashahel, NPP-ni Abdus Saleh baksa susae gittamgipa ong·oba, ua district council-o MDC ong·e donga. Ua Batabari MDC constituency-o susae membor ong·na seokako man·aha.
Ashahel-ni UDP dolo bakrimeanichi Congress dolna dal·ben gimaani ong·aha, maina batanggiminode uamang gimik sak 12 MDC-rang dongachim.
Council-ko rikna gita Congress dol sak 12 MDC-rang donganichi NPP-na batachim, indiba uamang council-ko rikna gita man·jaha maina NPP-ni sak 12 MDC-rang baksa Garo National Council MDC saksa, BJP-ni saksa aro Independent candidate sakgittamrang bakrimaha, indake uamang baksa gimik sak 16 ong·aha.
BJP dolni saksa MDC Tura-ni Bernard Marak ja·mano NPP bakrimgipa baksa jak on·paaha.
Indake, Congress dol da·ode council-o sak 11 MDC-rangsan dongaignok.
Indake, GHADC-ko da·o chalaienggipa NPP dolna man·dapani ong·aha. Chaiman post-na susaanio Babelapara-ni Rakesh A Sangma, Congress-ni Sadhiarani M Sangma-ko ame Chairman-na seoka man·aha aro deputy chairman-na susaanio Siju constituency-ni NPP MDC Albinush R Marak seoka man·skaaha.
