SHILLONG: A·songo ru·uta salrangna jingjenganggipa game-ge·e cha·giparangna ma·mong sorkarini ra·gatgipa ge·gittam farm laws-ko ra·galna BJP-ni dilenggipa NDA sorkarini manchiani ja·man Citizenship (Amendment) Act, 2019-ko ra·galna dabianio altuani ramako mesokaha.
A·dokni jegalgipa dolrang, ia Act-ko ra·galchina ma·mong sorkario dabianiko daktaina gita ku·mikchetaiaha.
Khasi Students’ Union (KSU) aro Federation of Khasi-Jaintia and Garo People (FKJGP) dolrangni Sombar-o aganani gitade CAA, a·doko songdonggipa joltangni manderangni kosako ong·a.
2019 bilsio ia Act-ko parliament-o bill tarie ra·gataonin union raken jegalaniko dakenga ine KSU president Lambokstar Marngar aganaha.
“Ma·mongni ra·gatgipa ia niam a·doko songdongkamgipa mongsongbate tribal jatrangna aro India-ni salgro-salaram a·dokrango songdongkamgiparangna namen jajrengsoani ong·a,” ine ua aganaha.
KSU, CAA-ni kosak raken ja·ku de·e ku·rangrangko on·angkugen ine ua aganaha, unbaksana, ma·mong, tribal jatrangni namnikgija kosako mande ra·gija ia niamko ra·gataha, ineba ua aganaha.
Northeastern ba salgro-salaram a·dokrango donggipa manderangni ku·rangko ma·mong sorkari knachakjaha ian namen rasong gribeani ong·a, ine ua agandapaha.
CAA-ni kosako jegalaniko dakna gita KSU a·dokni dingtang dingtang Khasi-Jaintia Hills-ni a·jarango tom·bimonganiko dakdilaha ine Marngar gisik ra·e aganaha.
“Batanggimin bilsignio, Covid sajinma sabisini a·selo ia niamni kosako jegalaniko dakna gita tom·bimonganiko aro chanchirimaniko dakdilna man·jaha. NorthEast Students’ Organisation-ni bak ong·e chinga je cholchiba CAA-ni kosako jegalaniko dakanggen,” ine ua aganaha.
Meghalaya a·doko jegalgipa dolrangni Inner Line Permit (ILP)-na dakgrikmitingo ma·mong CAA-ni gita sinjetaniko on·skaaha, ua aganaha.
KSU president-ni aganani gitade CAA-ni kosako jegalgiparangko ma·mong see ra·na gita nanga aro ge·gittam farm laws-ko ra·gala gita CAA-koba NDA sorkari ra·galgen ine ka·dongenga.
“Northeast-o songdonggipa manderangko mande ra·e apsan dakgipa ja·ku de·aniko CAA-ko ra·galanio dakgen ine chinga NDA sorkario ka·dongenga. Indake, a·doko ILP-na dabianiko daka baksana CAA-ni kosakoba chinga jegalaniko dakangkugen,” ine ua aganaha.
KSU president-ni agana baksa FKJGP president Wellbirth Rani-ni aganani gitade Northeast-o songdonggipa chongipa tribal jatrangni ku·rang on·aniko knachakgija ma·mong drae CAA-ko ra·gataha.
“CAA-ko ra·galchina gita chinga a·dok sorkarikoba sinjetaha. Chingni chakatani namen rongtala, ma·mong sorkari CAA-ko ra·galna gita nanga,” ine ua aganaha.
Uni aganani gitade North East Indigenous Peoples’ Forum (NEIPF), unoni FKJGP-ba bak dongpaa, ia dol CAA aro a·dokrango an·pachake dongenggipa sima-arirangni mamlani bidingo re·baenggipa bilsini January jao Kohima-o tom·bimonge chanchirimaniko daknasienga.
“CAA-na dabiani bilakbatrorobaani dipet ia tom·bimonganio CAA-an mongsonggipa agenda ong·gen,” ine FKJGP president aganaha.
Uni gitade, CAA-ni namgijaniko Assam a·dokba ma·siaha.
Covid sajinma sabisini a·selo gipin a·songni manderangko CAA-ko ra·gatani ja·man India-o napna ma·mong on·jaha, ine CAA-ko ra·gatani ja·man Meghalaya-an a·selo ga·akaha ine aganaha,
“Chingni a·doko gipin a·songni manderangko chinga napna on·na man·jawa maina a·doko songdonggipa chonggipa jatrangna namen kenani ong·gen,” ine Rani aganaha.
