SHILLONG: Meghalaya a·doko, All India Trinamool Congress-kode Bengal party inesa ra·a, uni gimin gital party ong·e a·doko dal·rorona nangnikode a·bachengaoni kam ka·na nanggen, ine NCP state president, Saleng Sangma aganaha.
Butbar salo kobor ra·timgiparang baksa agangrikmitingo MDA sorkari baksa bakrimgipa Saleng Sangma indine aganaha, “Meghalaya-o gital party baditan sokbaenga aro re·angenga aro AITC mikkangchi maidakgipa gadango ong·gen iani gimin agansona man·ja.”
“Jekoba aganbo AITC-ko Bengal party inesa u·itoka, uandake ILP aro CAA-na dakgrikani somoio haida ia party-ni gimin manderangni gisiko namgija chanchiarang dongnaba gnang, ine Sangma agandapaha.
Beben sak 12 MLA-rang AITC-o napangaha, indiba uamangni chu·gimik vote-rangba AITC-ona re·anggen inede ong·ja. Minggipin je Congress dilgiparangan AITC-ona re·angaha, uamang manderangko altue ra·na man·jawa.
“Dilgipa ong·ana na·a manderangko altue ra·na man·jawa, iarangni gisepon ge·sa party-oni ge·gipin party-ona jitaniara nama ong·ja, ine Sangma aganaha.
Indake ong·engon Mukul Sangma-ko matnangatengon, “Mukul Sangma an·tangan saksa dilgipa ong·eba leadership-ni gimin badi ka·a. Skangode manderangsa ‘Mukul Sangma zindabad Congress zindabad’ ine aganwatachim indiba da·ode Mukul Sangma an·tangsa, “Mamata Banerjee zindabad, TMC zindabad’ inskaenga.”
Uandake AITC-ko Mukul Sangma dila ong·ode Garo Hills-o AITC chegenma ine sing·on, Saleng indine aganchakaha, “Dr Mukul Sangma-ra PA Sangma ong·ja.”
