SHILLONG: Meghalaya a·dokni SSA skulrango skigiparangni jagnini dormaharangko on·na gita ma·mong sorkarioniko man·sogipa gong kror 59 tangkarangko treasury-ona on·atmanaha aro bakan ia tangkarangko a·jatangtangni District Mission Coordinator (DMC)-rangona watatahaon skigiparangna jagnini dormaharangko on·chengna man·gnok ine Bristibar salo Meghalaya a·dokni Education Minister Lahkmen Rymbui parakataha.
“Gong kror 59 tangkarangko chinga sal 10-mangna skangsan ma·mong sorkarioniko man·soahachim indiba BEAMS gita tangkarangko gamanio neng·nikanirangko chagrongna nangaha ine chinga koborko man·soaha. Indake ong·genchimoba da·o ia tangkarangko treasury-ona watatna man·aha aro bakan chinga skigiparangna jagnini dormaharangko on·na gita a·jatangtangni DMC-ona on·atna man·gnok,” ine Rymbui parakataha.
SSA skigiparangna bangki dormaharangko on·na man·na gita a·dok sorkari, gong kror 140 tangkarangko bi·atahachim indiba ma·mong sorkari, gong kror 59 tangkarangkosan a·dokna on·ataiahani gimin da·o jagnini dormaharangkosan skigiparangna on·chengna man·aiengachim.
Indake ong·engon, SSA skigiparangna chu·gimik dormaharangko on·kujaskal skigiparang, sorkarini kosako sinjetanirangko dakangkugen ine Meghalaya SSA Schools Association (MSSASA)-ni president Aristotle C Rymbai-ba parakatskaaha.
“Meghalaya sorkarion gong kror 104 tangkarang dongkuengani gimin chingni dormaharangko chu·gimik on·na man·na gita ia tangkarangkoba on·china chinga dabiangkugen. Chinga salsa salgnini gisepon iani bidingo sorkari official-rangko grongegen,” ine Rymbai parakataha.
SSA skulrango skigiparangna uamangni man·na nangkuenggipa dormaharangko on·kujaengani gimin All Garo Hills SSA School Teachers Association (AGHSSASTA)-ni ning·o donggipa skigiparangde re·anggipa Budbar sal dipetan, DC office mikkango okumu chake jingjengatna a·bachengahachim ine nikna man·a.