SHILLONG: Meghalaya a·doko Congress dolni sak 12 MLA-rang ong·katangani ja·man Meghalaya Pradesh Youth Congress (MPYC)-ni president aro gipin dilgiparangba ong·kate kattokahaon, Meghalaya a·doko MPYC aro National Students’ Union of India (NSUI) tangkuenga ine mesokna gita Sonibar salo Congress dolna kamko ka·enggipa bang·bea manderang Congress Bhawan-o tom·aniko ong·atangaha. Ia manderangko Indian Youth Congress (IYC)-ni Banphira Basaiawmoit aro NSUI-ni gitcham general secretary Arkin Warjri dilskaenga.
Iani bidingo kobor ra·timgiparangna talataniko on·angengon, Meghalaya a·doko da·oba Congress dolni chadambe dolrang tange dongkuenga aro raken kamrangko ka·engkua ine NSUI-ni gitcham general secretary Arkin Warjri parakataha.
“Meghalaya a·doko Congress dolni chadamberang bon·aha ine chanchijachina maina MPYC aro NSUI da·oba dongkuenga. Chinga bilakbate kamrangko ka·angkugen aro NSUI-ni pilak membor-rang baksa re·mikkangangkugen,” ine Warjri aganaha.
Meghalaya a·doko NSUI-ko bon·atahaoba da·o gital bimingrangko national president-na on·e NSUI-ko tangatpiltaigen ineba ua parakataha.
MPYC-ni membor-rang jinma ong·katgrimani gimin janapatengon, ia membor-rangni ong·katanichi MPYC bon·aha indake ong·ja indiba uamang da·o doltangko bilakatpiltaina kamko ka·gen ine IYC-ni dilgipa Banphira Basaiawmoit parakatskaaha.
Jagni skang a·bachengatgipa Youth Congress-o biming segataniko ia 2021 bilsini December 12 tariko matchotatgen aro da·o dipet sak 20,000-mangni gita chadamberang Youth Congress-o biming segataha ineba Basaiawmoit parakataha.