TURA: Maming u·iatchengani gri Shikandi Chak aro Shikandi songrangna bijoli on·aniko MeECL dontongatahani a·sel songni manderang aro mongsongbate poraienggipa chatro chatrirang neng·nikanirangko chagrongna nangtokengaha ine All Meghalaya Minority Students Union (AMMSU) parakatenba, ia songrango bijoliko on·piltaichina gita a·dok sorkariko didiataha.
Iani bidingo a·dokni Deputy Chief Minister aro Power Minister Prestone Tynsong-na sedoatengon, ia sal somoirango HSSLC aro SSLC porikkana selection test-rangko ra·engon, MeECL-ni iandake ia songrangna bijoli on·aniko dontongataniara chatro chatrirangna namen gimaani ong·gnok ine ia songrangna bijoliko on·piltaichina AMMSU didiataha.
AMMSU-ni parakatani gitade, ia songrango mitam nokdangrang bijolini kajinarangko gamjaengani gimin MeECL, bijoli jakkalenggipa nokdangrangna maming u·iatchengani gri, re·anggipa December 2 tarik dipet ia songrangona salanggipa bijoli line-ko rattongahachim.
“SSLC aro HSSLC porikkana selection test-rang, re·anggipa December 1 tarikonin a·bachengengaha indiba ia songrangona salanggipa bijoli line-ko rattonge galanichi chatro chatrirangnasa gimaani ong·gnok,” ine AMMSU-ni president Nur Islam Sk parakatenba, ia songrangna bijoliko ta·raken on·pilchina a·dokni Power Minister-ko didiataha.
