TURA: Mijal Robibar salo, Tura-ni KVK, World Soil Day-ko maniangaha aro ia salko manianio dingtang dingtang official-rang aro game ge·e cha·giparang gimik sak 45 bakko ra·angaha.
Ia program-ko ong·atanio Meghalaya Kisan Morcha-ni National Executive Membor Charles M Sangma, mongsonggipa sokgipa ong·e jinmana aganprakangengon, a·salrangko bikotani bidingo aganangenba, gama ge·anirang namna man·na gita a·arangko tarichina game ge·e cha·giparangko didiangaha. Agriculture aro gipin department-rangni ong·atenggipa training program-rangko donge gama ge·anirangko namdapatna gita skie ra·chinaba ua game ge·e cha·giparangko didiangaha.
Iana skang, Tura KVK-ni Senior Scientist aro Head Dr Joyoshree Mahanta, tom·bagiparangna rimchaksoani kattarangko aganangengon, ia World Soil Day-ko maniani miksongani aro gamchatani gimin jinmana talate on·angaha. A·salrangko tariani bidingoba ua game ge·e cha·giparangna agan-talate on·angaha.
Ia tom·anio East Garo Hills IBDLP-oni sokbagipa Dimsrang Sangma-ba jinmana aganprakengon, an·tangtangni gama ge·anirangko namdapatna gita ICAR, KVK, Agriculture, Horticulture aro uandakgipa department-rangni dakchakanirangko ra·china game ge·e cha·giparangko didiangaha.