SHILLONG: Meghalaya a·dokni bilsi 50 gapaniko maniani bak gita mikkang bilsi dipet a·dokni technical university aro college-rangko kulina a·dok sorkari manchimanaha.
A·dokni technical university-ko kuliani bidingo chanchirimna gita re·baenggipa January jao Tura-o Board-ni skanggipa tom·aniko ong·atgen ine a·dokni Education Minister Lahkmen Rymbui parakataha.
“A·dokni technical university-rangko chalaiani bidingo chanchirimna gita chinga January-ni 12 tariko board-ni skanggipa tom·aniko ong·atanggen,” ine Rymbui parakataha.
South West Garo Hills a·jao Captain Williamson Sangma Technical University-ko kulina gita 2011 bilsion pass ka·manahachim ine janapatengon, “2011 bilsion ia technical university-ko kulina niamko ra·gatahaoba changsaba board-ni tom·aniko ong·ata dongkujachim indiba ia technical university-ko a·bachengna gita chinga 2019 bilsio post-ko sanction ka·aha,” ine Rymbui parakataha.
Ia university-ko gong kror 16.96 korosko done rikengahachim aro da·o dipet kamrang 80 percent-ni gitade matchotaha ine kobor on·ahachim. Re·baenggipa January-ni 21 tariko Meghalaya a·dokni bilsi 50 gapaniko manina siengani gimin ia university-koba sorkari apsan salon kulina miksongsoengachim.
Indake ong·engon, Shillong polytechnic aro Planning & Architecture-koba sorkari, mikkang bilsion a·bachengatna jotton ka·gen ineba Education Minister parakataha.
Rymbui-ni parakatani gitade, Patharkhma aro Rongjeng-oba sorkari college-rangko rikmanaha aro ia college-rangkoba sorkari, mikkang bilsion a·dokni bilsi 50 gapaniko maniani bak gita kulie on·jolna nangnikenga.
Meghalaya a·dokni itihaso skanggipa changna People’s College Scheme-ni ning·o damsku college-rangko a·bachengna ra·chakmanaha ineba Education Minister parakataha.
2009 bilsion Sohra College, Baghmara-ni Captain Williamson Sangma Memorial College aro Williamnagar college-rangko sorkari jako ra·manahaoba ia college-rango building-rang dongkujachim ine janapatengon, ia college-rangna gital building-ko rikna gita a·dok sorkari, gong kror 30-na baten tangka paisarangko chame on·aha ine Rymbui parakataha.