SHILLONG: Nagaland a·doko sak 13 ramram manderangko sipai dolrangni so·otgalani ja·man salgro salaram a·dokrango ra·gatenggipa Armed Forces (Special Power) Act 1958-ko ra·galpilchina gita North East Students Organisation (NESO)-ba dabiangaha.
Koborko on·ani gitade, re·anggipa Sonibar attamo, Nagaland a·dokni Mon a·jao hajira kam ka·e cha·enggipa adita sak manderang, koela a·damoni pik-up van gario noktangtangchi re·angpilengmiting somoio, army-rang uamangko bobil dolni manderang ine ma·sisretenba, goe galtokahachim. Ia a·sel ong·ani Mon a·jao donggipa Oting aro Tiru songni gisepo ong·ahachim. Ia ramram manderangko so·ote galani ja·mano jolo songdongenggipa manderang ka·a ding·chaoenba, army camp-ko chadrapeskaaha aro uandaken sipairangoniba saksa so·otako man·ahachim.
Indake ong·engon, salgro salaramni Assam, Nagaland, Manipur aro Arunachal Pradesh a·dokni badiaba badiaba biaprango AFSPA-ko ra·gatengkuani a·sel ia biaprango army-rang skatang bilrangko jakkalenga ine NESO-ko man·chape salgro salaramni dingtang dingtang dolrang matnangatenba, salgro salaram a·dokrangoniko ia AFSPA-ko chu·gimik ra·galchina dabiangtokaha.
“Sipai dolrang, salgro salaram a·dokrango skatang bilrangko jakkale manderangko sinjete rona jotton ka·enga aro uamang AFSPA dongani giminsa ka·dongbate iandakgipa kamrangko ka·enga. Ma·mong sorkari salgro salaram a·dokrango songdongenggipa manderangna simsakgipa ong·bebeode ia AFSPA-ko chu·gimik ra·galsrangna nangchongmota,” ine NESO-ni chairman Samuel B Jyrwa parakataha.
Jyrwa-ni parakatani gitade, batanggimin somoirangoba sipai dolrang, salgro salaram a·dokrango bobil dake chakatgipa manderangko warachakaniko pa·sike, songni nokni manderangko kal·ake roaha aro me·chikrangko drae kal·akaha aro Sonibar attamo Nagaland a·dokni Mon a·jao ong·anggipa a·selba sipai dolrangni iandakgipa kamko gisik ra·atpilani gita ong·aha.