NEW DELHI: (PTI) Re·anggipa Sonibaro, Nagaland-o a·sel ong·e sak 14 ramram manderang so·otako man·ani ja·mano, ia mongsonggipa neng·nikani aro rakbegipa niam Armed Forces (Special Powers) Act-ko ra·galna nanga ine National People’s Party (NPP) MP Agatha Sangma Mongolbaro aganaha.
Mijal Lok Sabhao Zero Hour-ni somoio aganengon, Nagaland-ni Mon district-o, sak 14 ramram manderang chel·chakgipa dolni jako bobil dol ine potenba chadrapanio so·otako man·aha, ian namen rasong gribeani aroba matnangako man·a kragipa kam ong·a. Salgro salaramo indakgipa a·sel ong·ani ian skanggipa ong·ja, bang·a a·selon ia rakgipa AFSPA-ni a·sel bang·a ramram manderang so·otako man·simaienga ine NPP MP Agatha Sangma aganaha.
Ia niamko chel·chakgipa dolna on·ani a·selan, ramram manderang, kal·ake saknaataniko, til·ekdraako aro so·ote galako man·enga ia nitoa ong·ja, unigimin iako ra·galchina gita angni party-ni gita mol·molenga ong·ja indiba Salgro Salaramni manderangni palo aganenga ine Tura MP, aganaha.
‘‘Indakgipa a·sel batanggimin 2000 bilsioba Manipur-ni Imphal-o ong·angaha, jeon sak 10-na batpilen ramram manderang so·otako man·aha, je niamkon ra·galchina gita Manipur-ni bilsi 28 ong·gipa Irom Sharmila, bilsi 16-na kingking okgimu chakpile dabiahachim’’ ine Sangma aganaha.
Nagaland-o misilpile a·sel ong·ani ja·mano AFSPA-ko ra·galchina gita Meghalaya Chief Minister Conrad Sangma aro Nagaland Chief Minister Neiphiu Rio mang Sombaro dabiangaha, uamangna agreba bang·a dolrangan ia Act-ko ra·galchina gita raken dabitokaha aro iako ra·galchina gita dabiani ia chango bilakbatengaha ine nikatna man·a.
AFSPA, ian manderangko tom·tomatna gita, am·sandina, rim·na aro gona gita Indiani Salgro Salaramni dambri a·dokrango, chel·chakgipa dolna dingtangmancha on·gipa niam ong·a.
Indo-Myanmar sima ariogipa Nagaland-ni Mon district-ogipa Oting songo, Nagaland-o donggipa dolsa Army unit, songni manderangko bobil dolrang ine ma·sisretenba chadrape goahachim, jeon sak 14 ramram manderang so·otako man·ahachim.
Salgro Salaram a·dokrango bobil dake chakatgipa dolrangko bon·atna gita ia AFSPA-ko 1958-ko ra·gatenba chel·chakgipa dolna bilko on·ahachim.
