SHILLLONG: Batang-gimin chasongsao-nin power department-o grorang bang·en donga, jeon kror 2,000-na batpila, indakoba a·dok sorkarini rake kam ka·anichi japrakprak chotroroenba grorang da·o komiroro-angaha ine Power Minister Prestone Tynsong aganaha.
Ian bang·begipa gro ong·a, jean skang bilsi 10-15 rangonin bangki dongrorobaaha ine aganan baksa, power department aro Meghalaya Energy Corporation Limited (MeECL)-ni grorangko chotrorona sorkari raken kamrangko ka·enga ineba Tynsong aganaha. Smart metre-rangko ra·chak-tokaiama ine sing·anina aganchakengon, iako ra·chakna nangaigen maina ia smart metre-ara Corporation-na uandake consumer ba jakkalgiparangnaba namen namgni ong·a, iano maming dongnue dakani dongja aro tangka gamanio-ba maming daksret ka·-sretani dongja ineba Power Minister agandapaha.
